რუსეთის ქალაქ სოჭში თურქეთისა და რუსეთის პრეზიდენტების შეხვედრა უკვე სამი საათია მიმდინარეობს.
რუსული მედიის ცნობით, შეხვედრის დაწყებისას ვლადიმერ პუტინმა თურქ კოლეგას ვიზიტისთვის მადლობა გადაუხადა და აღნიშნა, რომ ორი ქვეყნის ურთიერთობამ განსაკუთრებული სტატუსი შეიძინა.
თავის მხრივ, თურქეთის პრეზიდენტმა განაცხადა, რომ მოსკოვისა და ანკარის ერთობლივ მოქმედებას ახლო აღმოსავლეთში გავლენის მოხდენა შეუძლია.
რუსეთში გამგზავრებმადე თურქეთის პრეზიდენტმა განსახილველ საკითხებზე ისაუბრა. რეჯეფ ტაიპ ერდოღანის განცხადებით, ვლადიმერ პუტინთან შეხვედრაზე განხილვის მთავარი თემა სირიის კონფლიქტი იქნება.
თურქეთის პრეზიდენტი ამბობს, რომ ანკარამ და მოსკოვმა სისხლისღვრის შესაჩერებლად მნიშვნელოვანი ნაბიჯები გადადგეს, მთავარი ამოცანა კი პოლიტიკური დარეგულირება იქნება.
მეორე საკითხად ერდოღანმა ორმხრივი სავაჭრო შეზღუდვების მოხსნა დაასახელა და აღნიშნა, რომ დაბრკოლებები სწრაფად უნდა გაუქმედეს.
გარდა ამისა, ორი ქვეყნის ლიდერები გაზსადენ თურქული ნაკადის პროექტსაც განიხილავენ.