საქართველოს პარლამენტმა მოახლოებული მსოფლიოს 20 წლამდელთა სარაგბო ჩემპიონატის მთავარ თასს უმასპინძლა.

„რაგბი ნამდვილად არის ჩვენი თამაში. ქართველების თამაში“, - ეს განცხადება პარლამენტის შენობაში, უმაღლესი საკანონმდებლო ორგანოს თავმჯდომარემ, ირაკლი კობახიძემ გააკეთა, სადაც რაგბის კავშირის წარმომადგენლებმა და ვეტერანმა მორაგბეებმა ტურნირის თასი მიიტანეს.

შეგახსენებთ, 31 მაისიდან 18 ივნისის ჩათვლით, მსოფლიოს 20 წლამდელთა ჩემპიონატს საქართველო პირველად უმასპინძლებს.

გამარჯვებული გუნდისთვის განკუთვნილი მთავარი ჯილდო ჩვენს ქვეყანაში 17 აპრილს ჩამოიტანეს და ყველა რეგიონში მოგზაურობას განაგრძობს.

დიდი სარაგბო ფორუმის შეხვედრები ქუთაისსა და თბილისში პარალელურად გაიმართება.