ქართველი მოჭიდავე ვლადიმერ ხინჩეგაშვილი მორიგ ტიტულს მიუახლოვდა. ოლიმპიური თამაშების, მსოფლიოს და ევროპის ჩემპიონი სერბეთში მიმდინარე კონტინენტის პირველობაზე ფინალში იჭიდავებს, სადაც მისი მეტოქე რუსი აჰმეტ ჩაკაევი იქნება.

ფინალური ბლოკი 21 საათზე დაიწყება. დღესვე, 74 კილოგრამში, ავთანდილ კენჭაძემ იჭიდავა, რომელიც უკანასკნელ წამზე, მსაჯების საეჭვო გადაწყვეტილებით, სომეხ ფალავანთან დამარცხდა.

ამ მომენტისთვის საქართველოს ნაკრების მონაგარი ორი ბრინჯაოს მედალია. 65 კილოგრამ წონით კატეგორიაში მოასპარეზე ზურაბ იაკობიშვილმა ბრინჯაოსთვის შევხედრაში აზერბაიჯანელი გიტინომაგომედ გაჯიევი 9-4 დაამარცხა, ხოლო 97 კილოგრამში ჩვენს ნაკრებს მეორე მედალი ელიზბარ ოდიკაძემ შესძინა, რომელმაც მაკედონიის წარმომადგენელი, მაგომედგაჯი ნუროვი დაჩაგრა და 10-0 აჯობა.

ხვალ, ტურნირის დასკვნით დღეს, საქართველოს ღირსებას დავიტ ტლაშაძე და გენო პეტრიაშვილი დაიცავენ.