საქართველოს პრემიერ-მინისტრი გიორგი კვირიკაშილი დღეიდან ვაშინგტონში მაღალი დონის შეხვედრებს გამართავს.

ვიზიტის ფარგლებში, მთავრობის მეთაურს ამერიკის შეერთებული შტატების ვიცე-პრეზიდენტი მაიკ პენსი თეთრ სახლში, თბილისის დროით 19:30 საათზე უმასპინძლებს, ხვალ კი პრემიერ-მინისტრს სახელმწიფო მდივანი რექს ტილერსონი მიიღებს.

იგეგმება შეხვედრები სენატსა და კონგრესში. ასევე გაიმართება დისკუსიები სამეცნიერო-კვლევით ცენტრებში, სადაც პრემიერ-მინისტრი საქართველოს დემოკრატიულ ტრანსფორმაციაზე ისაუბრებს.

როგორც დელეგაციის ერთ-ერთი წევრი, საგარეო საქმეთა მინისტრის პირველი მოადგილე დავით ზალკალიანი აცხადებს, მნიშვნელოვანია, რომ საქართველოს ორპარტიული მხარდაჭერა აქვს.

„ძალიან მნიშვნელოვანია, რომ საქართველოს აქვს ორპარტიული მხარდაჭერა. დღევანდელ შეხვედრებზე საუბარი იქნება ევროატლანტიკურ ინტეგრაციაზე და ტერიტორიული მთლიანობის საკითხებზე. ასევე ეკონომიკური თანამშრომლობის გაღრმავებაზე“,- განაცხადა ზალკალიანმა.

როგორც აშშ-იდან „მოამბის“ ჟურნალისტი იუწყება, პოლიტიკურ საკითხებზე მსჯელობის გარდა, ვიზიტის მიზანია ეკონომიკური თანამშრომლობის გაღრმავება.

ამასთან, დაგეგმილია შეხვედრა აშშ-ის კომერციის მდივან უილბურ როსთან.