კანადის დოკუმენტური ფილმების საერთაშორისო ფესტივალზე HOTDOCS CANADIAN INTERNATIONAL DOCUMENTARY FESTIVAL რეჟისორ თამთა გაბრიჩიძის დოკუმენტურმა ფილმმა „სოვდაგარი“, მოკლემეტრაჟიანი დოკუმენტური ფილმების ნომინაციაში გამარჯვება მოიპოვა.

Hotdocs „ოსკარის“ საკვალიფიკაციო ფესტივალი. აღნიშნულ ნომინაციაში გამარჯვებით, ფილმმა „ოსკარის“ მონაწილეობის კვალიფიკაცია მოიპოვა და 2018 წლის საუკეთესო მოკლემეტრაჟიანი დოკუმენტური ფილმების ნომინაციისთვის იბრძოლებს.

ფესტივალი 27 აპრილიდან 7 მაისის ჩათვლით ტორონტოში მიმდინარეობდა. ეს ერთ-ერთი ყველაზე მნიშვნელოვანი და მასშტაბური დოკუმენტური ფილმების ფესტივალია მთელს მსოფლიოში, რომელიც ყოველწლიურად ორასამდე ფილმს მასპინძლობს.

„სოვდაგარი“ რეჟისორმა საზოგადოებრივი მაუწყებლის პროექტის „ტელებლოგის“ ფარგლებში გადაიღო და „პირველი არხის“ ეთერში მისი პრემიერა 2016 წელს შედგა. ფილმზე საზოგადოებრივი მაუწყებლის გადამღები ჯგუფი მუშაობდა (ოპერატორი ივანე ანდიაშვილი, ხმის რეჟისორი ილია მაღრაძე, მონტაჟის რეჟისორი ნონა გოგოძე, პროდიუსერი ილია თავბერიძე).

ფილმისთვის სპეციალურად დაიწერა მუსიკა, რომელიც გიგი ჭიპაშვილს (PianoMan) ეკუთვნის. ფილმი სამცხე-ჯავახეთშია გადაღებული და მოგვითხრობს მოხეტიალე ვაჭრის ცხოვრებაზე, რომელიც კარტოფილის ძიებაში შემხვედრი ადამიანების ისტორიებს გვიამბობს. ისტორია ქალაქში იწყება და სამცხე-ჯავახეთის სოფლებამდე ჩადის, სადაც ფული - კარტოფილია, მასზე ცვლიან მეორად ტანსაცმელსა და საყოფაცხოვრებო ნივთებს. სოვდაგარი გელას გამოჩენას აქ მოუთმენლად ელიან.

თამთა გაბრიჩიძე რამდენიმე მოკლემეტრაჟიანი და დოკუმენტური ფილმის ავტორია. საზოგადოებრივი მაუწყებლის პროექტში „ტელებლოგი“, მან ასევე გადაიღო ფილმი „გუგულის გადაფრენა“, ბორჯომ-ბაკურიანის სარკინიგზო მატარებლის შესახებ.