ე.წ ციანიდის საქმეზე ბრალდებულის, დეკანოზ გიორგი მამალაძის ადვოკატების განცხადებით, დეკანოზს მეუფე დიმიტრის და სოსო ოხანაშვილის დასახელების სანაცვლოდ საპროცესო შეთანხმების გაფორმებას სთავაზობდნენ. მათი თქმით, ამას არაოფიციალურად, დაკითხვების დროს გამართულ შესვენებებზე სთხოვდნენ.

"მათ მიერ იყო მინიშნება, რომ თუ სასურველ ვერსიას იტყოდა, შეღავათი ექნებოდა. მინიშნება იყო სოსოზე და დიმიტრიზე.მამაოს პასუხი იყო "მე არ ვაპირებ, როგორც მე შემიკერეს საქმე, ისე მე შევუკერო სხვას და უდანაშაულოს დავადო ხელი.“,- აცხადებს გიორგი ფანცულაია.

დეკანოზის მეორე ადვოკატი აცხადებს, რომ სწორედ იმის გამო, რომ გიორგი მამალაძემ არ ითანამშრომლა პროკურატურასთან, მას შემდგომ უკვე ბრალი დაუმძიმეს.

„დღეს მიდის ე.წ ჯგუფის დადგენა, მაგრამ არ არსებობს ეს ჯგუფი, ისევე როგორც არ არ არსებობს დანაშაული. როცა თანამშრომლობა ვერ შედგა, დამძიმდა სასჯელი. ეს იყო არაოფოციალური მოთხოვნა. ასევე იყო კითხვები რაც საქმეს არ უკავშირდებოდა.“- აღნიშნა მიხეილ რამიშვილმა.

დეკანოზის ინტერესების დამცველების თქმით, ისინი ახლა არსებითი განხილვის პირველი სხდომისთვის ემზადებიან, რომელიც 19 მაისსაა ჩანიშნული.