ფაშიზმზე გამარჯვებიდან 72 წელი გავიდა. ვაკის პარკში შეკრებილ მეორე მსოფლიო ომის ვეტერანებს გამარჯვება საქართველოს თავდაცვის მინისტრმა მიულოცა, მათ ღვაწლზე ისაუბრა და უცნობი ჯარისკაცის საფლავი გვირგვინით შეამკო: „საქართველომ ფაშიზმზე გამარჯვებაში განსაკუთრებული წვლილი შეიტანა. ასიათასობით ქართველი შეეწირა ბრძოლას. ჩვენ ქედს ვიხრით მათი სახელების წინაშე, ვამაყობთ და მომავალი თაობებიც იამაყებენ მათი გმირობით. მინდა, ომის ვეტერანებს ჯანმრთელობა, დიდი ხნის სიცოცხლე და გამთლიანებულ საქართველოში ცხოვრება ვუსურვო“, - განაცხადა ლევან იზორიამ.
ფაშიზმზე გამარჯვების 72-ე წლისთავთან დაკავშირებული ღონისძიება მუსიკალურად საქართველოს შეიარაღებული ძალების ეროვნული გვარდიის სამხედრო-საჩვენებელმა ორკესტრმა გააფორმა.
მოგვიანებით თავდაცვის მინისტრი ვეტერანებს გაესაუბრა და მათ თავდადებისთვის მადლობა კიდევ ერთხელ გადაუხადა. ვაკის პარკში თავდაცვის მინისტრის მოადგილეები ლელა ჩიქოვანი და ნუკრი გელაშვილი, ასევე, გენერალური შტაბის უფროსი, გენერალ-მაიორი ვლადიმერ ჩაჩიბაია მოადგილეებთან ერთად იმყოფებოდნენ.
ღონისძიება თბილისის მერიის „ბიგ-ბენდის" კოცერტით გაგრძელდა. მეორე მსოფლიოში ომში გამარჯვების დღის აღსანიშნავად ვაკის პარკში საქართველოს ხელისუფლების, დიპლომატიური კორპუსისა და შეიარაღებული ძალების სხვა წარმომადგენლები მივიდნენ. საქართველოს კათოლიკოს-პატრიარქმა უცნობი ჯარისკაცის საფლავთან პანაშვიდი გადაიხადა.
დღესვე, ლევან იზორიამ საქართველოს მთავრობის სახელით ვეტერანებს საზეიმო მიღებაზე უმასპინძლა.