საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარის, რომან კაკულიას განცხადებით, ჯანდაცვის სამინისტროში კანონპროექტი მზადდება, რომლის მიხედვითაც, შრომის ინსპექტირება სავალდებულო გახდება.

რომან კაკულიამ ტყიბულში დაღუპული მეშახტეების ოჯახის წევრებს მიუსამძიმრა და ის საკანონმდებლო რეგულაციებზე ისაუბრა, რომლებიც შრომის უსაფრთხოების დაცვას ეხება.

"დღეისთვის ეს სფერო დარეგულირებულია "შრომის კოდექსის" 35-ე მუხლით, ასევე "წიაღის შესახებ" კანონითა და მთავრობის სპეციალური დადგენილებით, რომელიც ასეთი ტიპის შახტებში უსაფრთხოების ნორმებს ადგენს. "წიაღის შესახებ" კანონის მიხედვით, დამსაქმებელს გაწერილი ვალდებულება აქვს, რათა უსაფრთხოების ნორმები დაცული იყოს, იმ პირთა წრე განსაზღვროს, რომელთაც კანონის შესაბამისი ქმედებები უნდა შეიმუშაონ და პერიოდულად, ამ წესებთან დაკავშირებით, საწარმოში მომუშავე ადამიანების ინსტრუქტაჟი და ინფორმირება გააკეთონ. ამ ყველაფერს გამოძიება შეისწავლის. წინასწარი მონაცემებით, იმ ინფორმაციაზე დაყრდნობით, რაც თვითმხელებისგან გვაქვს, ასეთი მოსაზრება იკვეთება, რომ შესაძლებელია, ადგილი ჰქონდეს უსაფრთხოების ნორმების დარღვევას ადგილზე. ცხადია, ამ ყველაფერს გამოძიება დაადგენს“,-აღნშნა კაკულიამ.

მისივე თქმით, ჯანდაცვის სამინისტროში კანონპროექტზე მუშაობა მიმდინარეობს, როდესაც შრომის ინსპექტირება - ყველაზე მთავარი ხარვეზი რაც არსებობს, მისი არასავალდებულობა - სავალდებულო უნდა გახდეს.

„შრომის ინსპექციის მიერ ამ კანონმდებლობის შესრულების ვალდებულება ერთ-ერთი ხარვეზი იყო, თუმცა კანონმდებლობა და ის ორგანოები არსებობენ, რომლებიც ამაზე ზედამხედველობას ახორციელებდნენ. ამ შახტის ზედამხედველობა 2016 წლის მარტში იყო, მაგრამ გამოძიების შედეგებს დაველოდოთ", - განაცხადა კაკულიამ.

დეპუტატის ცნობით, ცვლილებების ინიცირება მიმდინარე წლის საგაზაფხულო სესიაზე მოხდება.