საპარლამენტო უმრავლესობის წევრი ანრი ოხანაშვილი სახალხო დამცველ უჩა ნანუაშვილს მეშახტეებთან დაკავშირებით გაკეთებული განცხადების გამო აკრიტიკებს.
პარლამენტის ადამიანის უფლებათა დაცვის კომიტეტის სხდომაზე, ოხანაშვილმა მინდელის სახელობის შახტაში მომხდარი უბედური შემთხვევის შედეგად დაღუპულთა ოჯახის წევრებს მიუსამძიმრა და აღნიშნა, რომ გამოძიება დაწყებულია და გონივრულ ვადაში გაირკვევა, რა მოხდა.
მისი თქმით, უბედური შემთხვევისგან არც ერთი ქვეყანა და მაღალგანვითარებული საწარმო თუ შახტა დაზღვეული არ არის, რადგან წინასწარ ვერ გათვლი, თუკი იქ რაიმე მნიშვნელოვან დარღვევას არ ჰქონდა ადგილი.
"ამიტომ, ეს ყველაფერი გამოძიებამ უნდა დაადგინოს. არ არის სწორი, სახალო დამცველმა ვინმეს მკვლელი უწოდოს, როცა სწორედ მან თითოეული ადამიანი უდანაშაულობის პრეზუმციის დარღვევისგან უნდა დაიცვას. სახალხო დამცველი მკვლელს უწოდებს იმ ადამიანებს - არ ვიცი, პარლამენტის წევრებს, მთავრობას, ყველას. სახალხო დამცველის პოზიციიდან გაკეთებული განცხადება არაკორექტულია. რა თქმა უნდა, სახალხო დამცველს აქვს უფლება დააფიქსიროს, რომ შეშფოთებულია მომხდართან დაკავშირებით და ვინმეს კიდევ ერთხელ მოუწოდოს, მაგრამ სახალხო დამცველი, რომელმაც საზოგადოების, თითოეული ჩვენგანის უფლება უნდა დაიცვას, ვინმეს მკვლელს არ უნდა უწოდებდეს. ეს ძალიან არაპროფესიონალური, არაკორექტული შეფასებაა. სახალხო დამცველის მხრიდან ასე პოზიციის დაფიქსირება, ძალიან ცუდია", - განაცხადა ოხანაშვილმა.
ტყიბულში მინდელის შახტაში მომხდარს საქართველოს სახალხო დამცველი სოციალურ ქსელ „ფეისბუქში“ გამოეხმაურა.
„ვინც ეწინააღმდეგება ეფექტური შრომის ინსპექციის შექმნას, მთავრობაში, პარლამენტში, საკონსტიტუციო კომისიაში თუ სხვაგან, თქვენ ხართ მკვლელები. ეს სიმართლეა. ჩვენ 4 წელია მოვითხოვთ შრომის ინსპექციის შექმნას. უბრალოდ, სირცხვილია, მეგობრებო“, - წერს უჩა ნანუაშვილი სოციალურ ქსელში.