სოფელ ხანდოსხევთან აქცია პოლიციასთან დაპირისპირებაში გადაიზარდა. მდგომარეობა მას შემდეგ დაიძაბა, რაც ადგილზე მობილიზებული სამშენებლო ტექნიკის სხვა ადგილზე გაყვანას ცდილობდნენ. აქციის ერთ-ერთმა მონაწილემ ტრაქტორს ქვა ესროლა და შუშა ჩაამტვრია. რის შემდეგაც სამართალდამცავებმა აქციის რამდენიმე მონაწილე დააკავეს.
დაკავებულთა ზუსტი რაოდენობა ამ დრომდე უცნობია. აქციის მონაწილეები ცდილობდნენ, რომ პოლიციის მანქანებისთვის გასვლის საშუალება არ მიეცათ. თუმცა მათ დაკავებულთა გაყვანა მაინც შეძლეს. ფიზიკური დაპირისპირების დროს ერთი ადგილობრივი დაშავდა, მას სავარაუდოდ ხელი აქვს მოტეხილი.
ამ წუთებში აქციის მონაწილეები დაკავებულების გათავისუფლების მოთხოვნით აქციის გაგრძელებას აპირებენ.
სოფელ ხანდოსხევთან აქცია დილიდან მიმდინარეობს. ისინი ელექტოგადამცემი ხაზის სამშენებლო სამუშაოებს აპროტესტებენ.
მათ ახლად გაყვანილი გზა აქვთ გადაკეტილი, რომელსაც კომპანია მთის ფერდობზე მაღალი ძაბვის ელექტოგადამცემი ხაზის სამშენებლო სამუშაოებისთვის ჭრის.
აქციის მონაწილეები აცხადებენ, რომ ტერიტორია მეწყერსაშიშია და სამუშაოები, რომელიც ენერგეტიკის სამინისტროს დაკვეთით სრულდება სოფლებს განადგურების საშიშროებას უქმნის, ასევე ნადგურდება ხეები და იმატებს სხვადასხვა დაავადები გავრცელების საფრთხე.