სოფელ ხანდოსხევთან მომხდარი დაპირისპირებისას ექვსი პირი პოლიციისთვის წინააღმდეგობის გაწევის ბრალდებით, ადმინისტრაციული წესით დააკავეს.
დუშეთში მოქალაქეები კვლავ მაღალი ძაბვის ელექტროგადამცემი ხაზის გაყვანის წინააღმდეგ გამოდიან.
სოფელ ხანდოსხევთან აქცია პოლიციასთან დაპირისპირებაში გადაიზარდა. მდგომარეობა მას შემდეგ დაიძაბა, რაც ადგილზე მობილიზებული სამშენებლო ტექნიკის სხვა ტერიტორიაზე გაყვანას ცდილობდნენ.
აქციის ერთ-ერთმა მონაწილემ ტრაქტორს ქვა ესროლა და შუშა ჩაამტვრია. რის შემდეგაც სამართალდამცავებმა აქციის რამდენიმე მონაწილე დააკავეს.
ფიზიკური დაპირისპირების დროს ერთი ადგილობრივი დაშავდა, მას, სავარაუდოდ, ხელი აქვს მოტეხილი. კიდევ ერთი დაპირისპირება დღეს ადგილზე დუშეთის გამგებლის გამოჩენამაც გამოიწვია.
სოფლის მცხოვრებლები ამბობენ, რომ სწორედ ვაჟა ჩოხელმა მიაწოდა ენერგეტიკის სამინისტროს ინფორმაცია, თითქოს მოსახლეობა ელექტრომაგისტრალის მშენებლობაზე თანახმა იყო. კამათი აქაც ფიზიკურ შეხლა-შემოხლაში გადაიზარდა.