საქართველოს შინაგან საქმეთა მინისტრის მოადგილის, შალვა ხუციშვილის განცხადებით, მოსკოვის ყოფილი მერი იური ლუჟკოვი სპეციალურ სიაში იქნება შეყვანილი და საქართველოში ვეღარ შემოვა.
როგორც ჟურნალისტებს ხუციშვილმა დღეს განუცხადა, საქართველოში შემოსვლა-არშემოსვლის საკითხი ერთია და მეორეა, სისხლის სამართლის პასუხისმგებლობის საკითხი.
"არსებობს სპეციალური სია, სადაც შეყვანილი არიან ასეთი ადამიანები. შეიძლება, ლუჟკოვი თავის დროზე ამ სიაში შეტანილი არ იყო. მას ამ სიაში შევიტანთ და საქართველოში ვეღარ შემოვა", - განაცხადა ხუციშვილმა.
ამ განცხადებას თავად ლუჟოვიც გამოეხმაურა, რომელმაც გადაწყვეტილებას უგუნური უწოდა.
მოსკოვის ყოფილმა მერმა, რომელიც ოკუპირებულ აფხაზეთში არაერთხელ არის ნამყოფი და დარღვეული აქვს საქართველოს კანონი „ოკუპირებული ტერიტორიების შესახებ“, რამდენიმე დღის წინ საქართველოში იმყოფებოდა.