15 მაისს, თბილისში თანამედროვე მუსიკისა და ვიზუალური ხელოვნების საერთაშორისო ფესტივალი SOU 2017 გაიხსნება. ფესტივალის წლევანდელი სეზონის სახელწოდებად ორგანიზატორებმა „სხვა ზღვა“ შეარჩიეს.

„“სხვა ზღვა“ არცერთი კონკრეტული ზღვა არ არის - არც აღმოსავლეთით, არც დასავლეთით. არც შავი, არც სხვა. ეს წარმოსახვითი ზღვაა, რომელიც ტერიტორიის გარშემო უკვე არსებულ ნაკადებს ანაცვლებს და სრულიად ახალ სააზროვნო სივრცეს ხსნის. ჩვენს მთავარ ინტერესებად ისევ რჩება ხმისა და კომპოზიციის თანამედროვე კვლევები და მათი ვიზუალური რეპრეზენტაციის ახალი ფორმები. ასევე, არსებული საგამოფენო თუ მუსიკალური სივრცეების გაცოცხლება თუ რეინტერპრეტაცია,“- აცხადებენ თანამედროვე მუსიკის ფესტივალის დამფუძნებლები.

ფესტივალი თბილისის ცირკის არენაზე ქართველი არტისტის Tete Noise-ს კონცერტით გაიხსნება, რომელიც სიმებიან კვარტეტთან ერთად „The Stringers” დაუკრავს. ფესტივალის დასკვნითი საღამო კი, 5 ივლისს ოპერის თეატრში შედგება. სცენაზე ჰაცუნე მიკუს და კიიჩირო შიბუიას ვოკალოიდური ოპერა „დასასრული“ იქნება წარმოდგენილი.