ბაბუის მკვლელობაში ბრალდებულ შვილიშვილს და მის მეგობარს, აღკვეთის ღონისძიების სახით, პატიმრობა შეეფარდათ. მოსამართლემ პროკურატურის შუამდგომლობა დააკმაყოფილა.
ბრალდებულები დუმილის უფლებას იყენებენ. შინაგან საქმეთა სამინისტროს ინფორმაციით, მათ ბრალი აღიარეს,
საპასუხოდ კი ადვოკატები აცხადებენ, რომ ადგილი ჰქონდა ფსიქოლოგიურ ზეწოლას.
პროკურორის ცნობით, არსებობს მტკიცებულება, კონკრეტულად კი წერილი, სადაც ისინი 77 წლის მამაკაცის მკვლელობას გეგმავდნენ. გამოძიების ინფორმაციით, ბაბუას შვილიშვილმა და მისმა მეგობარმა სასიკვდილო ჭრილობები ცივი იარაღით მიაყენეს, კვალის დაფარვის მიზნით, კი ბინაში ხანძარი გააჩინეს.
ბრალდება მკვლელობის მოტივად ანგარებას ასახელებს. დაკავებულებს განზრახ მკვლელობა ედებათ ბრალად. საქმესთან დაკავშირებით მომდევნო სასამართლო პროცესი 3 ივლისს გაიმართება.