ტყიბულში დაღუპული მეშახტეები ცოტა ხნის წინ საგვარეულო სასაფლაოებზე დაკრძალეს.
ტყიბულში ჩავიდა საქართველოს პრემიერ-მინისტრი. გიორგი კვირიკაშვილი ოთხივე დაღუპულის ოჯახში იმყოფებოდა და ოჯახის წევრებს პირადად მიუსამძიმრა.
დაღუპულთა ოჯახებს მიუსამძიმრეს ადგილობრივი ხელისუფლების წარმომადგენლებმა, მათ შორის იმერეთის გუბერნატორმა, გივი ჭიჭინაძემ.
შეგახსენებთ, 9 მაისს ტყიბულში, მინდელის სახელობის შახტში გეგმური სამუშაოების შესრულებისას ოთხი მეშახტე დაიღუპა - ალეკო ჭელიშვილი, გიზო კუბლაშვილი, ბიქტორ დაღუნდარიძე და გიზო გუბელიძე.
მომხდარ შემთხვევასთან დაკავშირებით, შინაგან საქმეთა სამინისტრომ გამოძიება სსკ-ის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას ითვალისწინებს.
მინდელის სახელობის შახტი, სადაც მეშახტეები დაიღუპნენ, კომპანია "საქნახშირს" ეკუთვნის.