საზოგადოებრივი აზრის მორიგი კვლევის შედეგები- NDI-ის მიერ გამოკითხულთა უმრავლესობა აცხადებს, რომ მათ შეხედულებებთან არც ერთი პოლიტიკური პარტია ახლოს არ დგას.

29 % მიიჩნევს, რომ მათ შეხედულებებთან ყველაზე ახლოს ქართული ოცნება დგას, 10 % ერთიანი ნაციონალური მოძრაობას ასახელებს. 4 % პატრიოტთა ალიანსს, 3 % კი ლეიბორისტული პარტიას.

NDI ოთხი პოლიტიკური ლიდერის საქმიანობის შეფასების რეიტინგსაც აქვეყნებს, სადაც საქართველოს პრეზიდენტის საქმიანობას კარგად და ძალიან კარგად ჯამში 27 % აფასებს, მეორე ადგილზეა პრემიერი გიორგი კვირიკაშვილი 25 %-ით, შემდეგ პარლამენტის თავმჯდომარე ირაკლი კობახიძე 15%-ით, თბილისის მერი კი 8 %-ით.

კვლევის მიხედვით, გამოკითხულთა 84 % მიიჩნევს, რომ საქართველოს პრეზიდენტის არჩევა პირდაპირი წესით უნდა მოხდეს. მხოლოდ 9% ფიქრობს, რომ პრეზიდენტი უნდა აირჩიონ ხალხის მიერ არჩეულმა წარმომადგენლებმა.

ასევე გამოკითხულთა უმრავლესობა არ ეთანხმება მაჟორიტარული საარჩევნო სისტემის გაუქმებას.

აღნიშნული გამოკითხვა ჩატარდა 7-28 აპრილის პერიოდში და საქართველოს მასშტაბით 2,493 პირი პირისპირ ინტერვიუს წესით გამოიკითხა.

კვლევაში საშუალო ცდომილების ზღვარი არის +/- 2,7 პროცენტი. NDI-ის კვლევები ხორციელდება დიდი ბრიტანეთის მთავრობის ფინანსური ხელშეწყობით და მას ატარებს სი-არ-არ-სი საქართველო.