გეგმის მიუხედავად, საკონსტიტუციო ცვლილებების საჯარო განხილვა დღეს ვერ დასრულდა. დისკუსიის ნაცვლად თბილისის საკონცერტო დარბაზი პოლიტიკური ურთიერთბრალდებების ეპიცენტრად იქცა. საყოველთაო განხილვის ფარგლებში დაგეგმილი ბოლო შეხვედრა დამსწრეთა ერთი ნაწილის მწვავე პროტესტის გამო ჩაიშალა.
ტყიბულში მომხდარი ტრაგედიის გამო, სიტუაცია შეხვედრის პირველივე წუთზე დაიძაბა. აუდიტორია 115-ის წევრებთან ერთად, განსაკუთრებით აქტიურობდნენ მთავრობის ყოფილი წევრი სანდრო ბრეგაძე და ლადო სადღობელაშვილი, რომლებმაც მიწების უცხოელებზე გაყიდვის აკრძალვა მოითხოვეს.
არაერთი მოწოდების მიუხედავად, დარბაზში საპროტესტო შეძახილები არ შეწყდა, რასაც ირაკლი კობახიძის მწვავე განცხადება მოჰყვა. მმართველი გუნდი დღევანდელ ინციდენტს წინასწარ ორგანიზებულ პროვოკაციად აფასებს.