კონსტიტუციაში შესატანი ერთ-ერთი მთავარი ცვლილების ამოქმედება კითხვის ნიშნის ქვეშ დგას. ივნისიდან პროექტის განხილვა პარლამენტში დაიწყება, თუმცა მაჟორიტარული სისტემის გაუქმებაზე მმართველ გუნდში შეთანხმების მიღწევა ვერ ხერხდება.
დეპუტატების, მათ შორის მაჟორიტარების ნაწილი, პოზიციის შეცვლას არ აპირებს, რის გამოც კენჭისყრის დროს კონსტიტუციის პროექტის მისაღებად საჭირო 113 ხმა შესაძლოა ვერ შეგროვდეს.
,,ქართულ ოცნებაში” ინტენსიური კონსულტაციები მიმდინარეობს. მაჟორიტარული სისტემის შენარჩუნების მომხრე თანაგუნდელების დასარწმუნებლად მმართველი პარტია, სავარაუდოდ, საჯარო განხილვასაც გამოიყენებს, რომელიც ორი კვირით გახანგრძლივდა.
10 ქალაქში და თბილისის 10 რაიონში დამატებითი შეხვედრების ჩატარება გადაწყდა. გუშინდელი ინციდენტის გამო გამკაცრდება უსაფრთხოების ზომებიც.