„ვიკილიქსის“ ინფორმატორი ჩელსი, იგივე ბრედლი მენინგი, რომელმაც შეერთებული შტატების ისტორიაში ყველაზე მასშტაბური რაოდენობის საიდუმლო დოკუმენტები გაასაჯაროვა, საპყრობილეს დღეს დატოვებს.

2013 წელს ტრიბუნალმა მას 35 წლით თავისუფლების აღკვეთა შეუფარდა. ბრედლი მენინგმა, „ვიკილიქსის“ საშუალებით, ასობით ათასი სამხედრო და დიპლომატიური დოკუმენტი გაასაჯაროვა, მათ შორის სახელმწიფო დეპარტამენტის 250 000-მდე დიპლომატიური წერილი, საჰაერო დარტყმების ვიდეოჩანაწერები, რომელთა შედეგადაც მშვიდობიანი მოქალაქეები დაიღუპნენ.

ასევე, ასობით ათასი ანგარიში ავღანეთისა და ერაყის ფრონტზე მომხდარი ინციდენტების შესახებ და გუანტანამოს ციხის პატიმართა მონაცემები.

საპყრობილეში ყოფნისას ბრედლი მენინგმა სქესი შეიცვალა და ჩელსი მენინგი გახდა, თუმცა სასჯელის მოხდას კვლავ მამაკაცებისთვის განკუთვნილ ციხეში განაგრძობდა.

2016 წლის განმავლობაში მან სიცოცხლის თვითმკვლელობით დასრულება ორჯერ სცადა.

ჩელსი მენინგი პრეზიდენტმა ბარაკ ობამამ, 64 სხვა პატიმართან ერთად, თეთრი სახლის დატოვებამდე რამდენიმე დღით ადრე შეიწყალა. „ვიკილიქსმა“, მის გათავისუფლებასთან დაკავშირებით, „ტვიტერის“ გვერდზე მოქალაქეებს ჩელსი მენინგისთვის თანხის შეგროვებისკენ მოუწოდა. ანგარიშის გამოქვეყნებიდან რამდენიმე საათში თანხამ 100 000 დოლარს გადააჭარბა.

წყარო: NBC News, New York Times