გამოძიებასთან თანამშრომლობისთვის მზად ვართ, - ამის შესახებ ყოფილი გენერალური პროკურორის ოთარ ფარცხალაძის ადვოკატმა გაგი მოსიაშვილმა განაცხადა.
მოსიაშვილის თქმით, მათ ხელთ არსებული მტკიცებულებები ადასტურებს, რომ 10 კაცის მხრიდან არ განხორციელებულა თავდასხმა, არამედ ეს იყო წამიერი გაურკვევლობა, რომელიც პირადი დაცვის უშუალო ჩარევით განეიტრალდა.
რაც ეხება ოთარ ფარცხალაძის ადვოკატების მიერ დღეს გაკეთებულ განცხადებას, რომ, შესაძლოა, ლაშა თორდიამ სხვაგან მიიღო დაზიანება ან თვითდაზიანება მიიყენა, ამ საკითხზე გაგი მოსიაშვილმა კიდევ ერთხელ ისაუბრა.
„ჩვენ აღვწერეთ ფაქტობრივი გარემოებები, რაც მიანიშნებს იმას, რომ ფიზიკურად შეუძლებელი იყო, წამის მეასედ მონაკვეთში ის ამბავი მომხდარიყო, რაც მოუთხრო საზოგადოებას ბატონმა ლაშა თორდიამ. მტკიცებულებები, რაც ჩვენ გაგვაჩნია, ადასტურებს იმ ფაქტს, რომ 10 კაცის მხრიდან არ ყოფილა განხორციელებული თავდასხმა და აქ არანაირ თავდასხმაზე არ იყო საუბარი, უბრალოდ, ეს იყო წამიერი გაურკვევლობა, რომელიც პირადი დაცვის უშუალო აქტიური ჩარევით განეიტრალდა.
მტკიცებულებების სახით, არსებობს გამოკითხვის ოქმები, ინფორმაცია, რომელიც დაცვამ მოიპოვა კანონიერად, ასევე თვითმხილველების ჩვენებები, რომლებიც ამას ადასტურებს.
ვიდეოჩანაწერებთან დაკავშირებით, ჩვენ მივმართეთ შესაბამის უწყებებს და როგორც კი გვექნება ეს ჩანაწერები, რა თქმა უნდა, საზოგადოება ამ ჩანაწერებს იხილავს.
ჩვენ არ ვამბობთ, რომ იყო თვითდაზიანება, მაგრამ კონკრეტული ფაქტობრივი გარემოებები მიუთითებს იმას, რომ იქ არ ყოფილა ის მოცემულობა, რაზეც საუბრობს ბატონი ლაშა თორდია“, - განაცხადა გაგი მოსიაშვილმა.
ყოფილი მთავარი პროკურორის ოთარ ფარცხალაძის ადვოკატები არ გამორიცხავენ, რომ სახელმწიფო აუდიტის სამსახურის უფროსმა ლაშა თორდიამ თვითდაზიანებები მიიყენა.
ლაშა თორდიას განცხადებით, მას მას თავს დაესხა ყოფილი მთავარი პროკურორი ოთარ ფარცხალაძე და მასთან ერთად მყოფი რამდენიმე პირი.
ლაშა თორდიას საქმეზე შსს-მ გამოძიება სისხლის სამართლის კოდექსის 126-ე მუხლის პირველი ნაწილით დაიწყო, რაც გულისხმობს ძალადობას, რამაც დაზარალებულის ფიზიკური ან ფსიქიკური ტანჯვა გამოიწვია, თუმცა არ მოჰყოლია ჯანმრთელობის განზრახ მძიმე ან ნაკლებად მძიმე დაზიანება. ისჯება თავისუფლების შეზღუდვით ვადით ორ წლამდე ან თავისუფლების აღკვეთით ვადით ერთიდან სამ წლამდე.