იუსტიციის უმაღლეს საბჭოში შემადგენლობა იცვლება. ოთხ არამოსამართლე წევრს უფლებამოსილების ვადა ეწურება. მათ შორისაა არაერთი რეზონანსული განცხადების თუ ინიციატივის ავტორი ევა გოცირიძეც.

პარლამენტის კვოტით შესარჩევი კანდიდატები აკადემიურმა წრეებმა, არასამთავრობო ორგანიზაციებმა და ადვოკატთა ასოციაციამ უნდა წარადგინოს, თუმცა წინა კონკურსის შედეგების გამო, უფლებადამცველთა ნაწილი პროცესს უნდობლობას უცხადებს.

არამოსამართლე წევრებთან ერთად, იუსტიციის საბჭოში სამი მოსამართლე წევრის ადგილიც ვაკანტური ხდება. ერთ-ერთი ლევან მურუსიძეა, რომელიც სააპელაციო სასამართლოში უვადოდ დანიშვნისთვის იბრძვის.