„ვიკილიქსის“ დამაარსებელმა ჯულიან ასანჟმა მის მხარდამჭერებსა და თანამშრომლებს გამარჯვება მიულოცა.
ეკვადორის საელჩოს აივნიდან ასანჟმა განაცხადა, რომ შვედეთის პროკურატურის მოულოდნელი გადაწყვეტილება თავისუფლებისკენ გადადგმული ნაბიჯია.
შვედეთის პროკურატურამ ჯულიან ასანჟის საქმეზე გამოძიება შეწყვიტა. მას სექსუალურ ძალადობაში ედებოდა ბრალი.
ამის მიუხედავად, გაერთიანებული სამეფოს შინაგან საქმეთა სამინისტრო აცხადებს, თუ ასანჟი ეკვადორის საელჩოს დატოვებს, მას დააპატიმრებენ. ეკვადორის საელჩომ გაერთიანებული სამეფოს მთავრობას თხოვნით უკვე მიმართა, რომ შვედეთის გადაწყვეტილებას პატივი სცენ და ასანჟის უსაფრთხოდ გადაადგილება უზრუნველყონ.
ასანჟი ლონდონში მდებარე ეკვადორის საელჩოს თითქმის 5 წელია აფარებს თავს. ვაშინგტონი მას ათიათასობით საიდუმლო დოკუმენტის გასაჯაროებაში სდებს ბრალს.