ჟურნალისტი გიორგი დარასელია პოლიციელებს ფიზიკურ შეურაცხყოფაში ადანაშაულებს.

როგორც დარასელიამ საზოგადოებრივს განუცხადა, ინციდენტი სამების მიმდებარე ტერიტორიაზე მოხდა, როდესაც საპატრულო პოლიციის წარმომადგენლები მოქალაქეს აჯარიმებდნენ.

ჟურნალისტი ამბობს, რომ მან აღნიშნულის გამო პოლიციელებს განმარტება მოთხოვა, რა დროსაც მისივე თქმით, სამართალდამცავებმა მას ფიზიკური შეურაცხყოფა მიაყენეს.

დარასელიას განმარტებით, აღნიშნული ფაქტის შემდეგ ის შინაგან საქმეთა სამინისტროს ტერიტორიაზე გადაიყვანეს, სადაც ოთხი საათის განმავლობაში იმყოფებოდა.

„შინაგან საქმეთა სამინისტროს ტერიტორიაზე უკან აქვთ მანქანების სამრეცხაო, იქ მიმიყვანეს და ოთხი საათის განმავლობაში ხელბორკილებით ვყავდი.

სწორედ აქ შეადგინეს ოქმი, სადაც ჩაწერეს, რომ საპატრულო პოლიციას ჯარიმის გამოწერაში შევუშალე ხელი. ოთხი საათის გასვლის შემდეგ, წამიყვანეს სასამართლოში, სადაც მოსამართლემ არ გაითვალისწინა მოწმეების ჩვენებები და 500 ლარით დამაჯარიმა“,- განაცხადა გიორგი დარასელიამ.

ჟურნალისტი სასამართლოს მიერ 500 ლარით დაჯარიმებას აპროტესტებს და აცხადებს, რომ მოსამართლის გადაწყვეტილებას გაასაჩივრებს.

როგორც შინაგან საქმეთა სამინისტროში საზოგადოებრივს განუცხადეს, გ.დ.-მ საპატრულო პოლიციას არ მისცა საშუალება საკუთრი სამუშაო შეესრულებინა.

შსს-ში განმარტავენ, რომ მოქალაქე სამართალდამცველებმა კანონის ყველა წესის დაცვით დააკავეს.

უწყების პრესსამსახურის ცნობით, სასამართლომ განიხილა ყველა მტკიცებულება, მათ შორის ვიდეოჩანაწერები და გ.დ. სამართალდამრღვევად ცნო.

„საპატრულო პოლიციის თანამშრომლები სამსახურებრივ მოვალეობას ასრულებდნენ. გ.დ.-მ დაიწყო მათთვის ხელის შეშლა. საპატრულო პოლიციამ რამდენჯერმე მოუწოდა მოქალაქეს, მიეცა საშუალება სამართალდამცველებს საკუთარი სამუშაო შეესრულებინა.

მიუხედავად მრავალგზის მოწოდებისა, მოქალაქე არ დაემორჩილა სამართალდამცველებს, რის შემდეგაც, გ.დ. საპატრულო პოლიციამ ადმინისტრაციული სამართალდარღვევათა კოდექსის 173-ე მუხლით დააკავა, რაც სამართალდამცავი ორგანოს მუშაკის, სამხედრო მოსამსახურის, სახელმწიფო დაცვის სპეციალური სამსახურის თანამშრომლის ან აღსრულების პოლიციელის კანონიერი განკარგულებისადმი ან მოთხოვნისადმი დაუმორჩილებლობას გულისხმობს.

შესაბამისი დოკუმენტაციის მოწესრიგების შემდეგ, გ.დ.სასამართლოში გადაიყვანეს, სადაც მოსამართლემ ნახა ყველა მტკიცებულება, მათ შორის, სამხრე ვიდეოკამერაზე გადაღებული მასალა და მოქალაქე სამართალდამრღვევად ცნო. მას 500 ლარიანი ჯარიმა დაეკისრა“,- აცხადებენ შინაგან საქმეთა სამინისტროში.



ფოტო, რომელიც ჟურნალისტის თქმით, დღევანდელ ინციდენტს ასახავს, თავად გიორგი დარასელიამ მოგვაწოდა.