სახელმწიფო აუდიტის სამსახურის დასკვნა 22 მაისს გასაჯაროვდება. როგორც უწყების ხელმძღვანელმა, ლაშა თორდიამ ჟურნალისტებს განუცხადა, საქმე ეხება მერიაში მიწების ჩანაცვლებას, ასევე აუქციონების პირობებს, რომელზეც აუდიტის სამსახურს გარკვეული კითხვის ნიშნები აქვს.

თორდიას განცხადებით, რისკის შემცველია ის გარემოებები, რომელზეც აუდიტის სამსახური საუბრობს.

„ჩვენ ვაპირებთ, გავასაჯაროოთ აუდიტის დასკვნა, სადაც საუბარია მერიაში მიწების ჩანაცვლებასთან დაკავშირებით, ასევე აუქციონების პირობებთან დაკავშირებით, რომელზეც აუდიტის სამსახურს აქვს კითხვის ნიშნები და ვფიქრობთ, რომ რისკის შემცველია ის გარემოებები, რომელზეც ჩვენ ვსაუბრობთ“ - აღნიშნა ლაშა თორდიამ.

ლაშა თორდიას თქმით, საქმე ეხება ოთარ ფარცხალაძის პრივილეგირებულ მდგომარეoბაში ჩაყენებას. თორდია ფიქრობს, რომ აუცილებელია, სამართალდამცველმა უწყებამ აღნიშნული ფაქტები დამატებით შეისწავლოს.

„საუბარი ეხება ერთ-ერთი კონკრეტული ადამიანის, ოთარ ფარცხალაძის გარკვეულ პრივილეგირებულ მდგომარეობაში ჩაყენებას. შესაბამისად, ამ რისკებზე დაყრდნობით ვფიქრობთ, რომ აუცილებლად არის დამატებითი შესწავლა საჭირო სამართალდამცველი უწყების მხრიდან“, - განაცხადა აუდიტის სამსახურის ხელმძღვანელმა.

შეგახსენებთ, სახელმწიფო აუდიტის სამსახურის ხელმძღვანელმა 13 მაისს მომხდარი ინციდენტი მის საქმიანობას და იმ ანგარიშს დაუკავშირა, რომელსაც, თორდიას თქმით, სახელმწიფო აუდიტის სამსახური ოთარ ფარცხალაძის კომპანიის შესახებ ამზადებდა.

ლაშა თორდიას ფიზიკური შეურაცხყოფა 13 მაისს შარდენის ქუჩაზე მდებარე ერთ-ერთ კაფეში მიაყენეს, რაშიც სახელმწიფო აუდიტის სამსახურის ხელმძღვანელი ყოფილ მთავარ პროკურორ ოთარ ფარცხალაძეს ადანაშაულებს. ოთარ ფარცხალაძე ბრალდებებს უარყოფს.