დედაქალაქის მერი დავით ნარმანია არ გამორიცხავს, რომ მომავალში აუდიტის სამსახურს უხელმძღვანელოს.
როგორც დავით ნარმანიამ ჟურნალისტებს განუცხადა, მთავრობასთან კონსულტაციები მიმდინარეობს რამდენიმე მნიშვნელოვან საკითხზე, მათ შორის აუდიტის სამსახურის ხელმძღვანელის დანიშვნაზე.
კითხვაზე, გადაწყვეტილია თუ არა მისი აუდიტის სამსახურის ხელმძღვანელად დანიშვნა და მოიაზრება თუ არა დედაქალაქის მერის თანამდებობაზე კახი კალაძე, ნარმანიამ აღნიშნა, რომ მოლაპარაკებები ბევრ საკითხზე მიმდინარეობს.
"ეს ინფორმაცია არის გავრცელებული ინფორმაცია და ნუ გავუსწრებთ მოვლენებს. იქნება შესაბამისი გადაწყვეტილებები მიღებული და გაიგებთ ამის შესახებ. კონსულტაციები მიმდინარეობს რამდენიმე მნიშვნელოვან საკითხზე, მათ შორის არჩევნების საკითხებზე. განიხილება რამდენიმე ვერსია, მათ შორის ეს ვერსიაც", - განაცხადა დავით ნარმანიამ.
აუდიტის სამსახურის ხელმძღვანელს საქართველოს პარლამენტი ხუთი წლის ვადით ამტკიცებს. აუდიტის სამსახურის ამჟამინდელ უფროსს ლაშა თორდიას ვადა მიმდინარე წლის ივლისში ეწურება.