საქართველოს დამოუკიდებლობის დღის 26 მაისის აღსანიშნავი ღონისძიებებისთვის მზადება თბილისში.

თავისუფლების მოედანზე წვევამდელთა ფიცის დადების საზეიმო ცერემონიის გენერალური რეპეტიცია გაიმართა, რომელიც 26 მაისს, 12:00 საათზეა დაგეგმილი.

26 მაისს 324 სამხედრო მოსამსახურე, რომლებმაც წარმატებით გაიარეს სამხედრო კურსი, სამხედრო ფიცს დადებს, ასევე გაიმართება, როგორც ქართული, ისე უცხოური ჯავშანტექნიკის გამოფენა.

გამოფენა წარმოდგენილი იქნება საქართველოს კიდევ 11 ქალაქში. წელს პირველად, 26 მაისი თემატურ დატვირთვას იძენს და ეს იქნება შოთა რუსთაველის "ვეფხისტყაოსანი".

დამოუკიდებლობის დღის აღსანიშნავ ღონისძიებაზე, რუსთაველის გამზირზე მეწარმეები „ვეფხისტყაოსნის“ თემატიკასთან დაკავშირებულ პროდუქციას წარმოადგენენ.

ასევე, წელს პირველად, ღონისძიებაში ერთვება "სოლიდარობის ფონდი", სადაც მთელი დღის განმავლობაში ნამუშევრების გამოფენა გაიმართება და აუქციონიდან შემოსული თანხა მთლიანად ამ ფონდს გადაეცემა. 26 მაისის ღონისძიება საღამოს გალა კონცერტით დასრულდება.