მანჩესტერის საკონცერტო დარბაზში მომხდარი ტერაქტის განმახორციელებელის ვინაობა ცნობილია.
ის მანჩესტერში მცხოვრები ლიბიელი წარმოშობის 22 წლის სალმან აბედი აღმოჩნდა. სალმან აბედი თავდასხმამდე სამი კვირით ადრე ლიბიაში იმყოფებოდა.
ახლა გამოძიება ცდილობს დაადგინოს, ჰყავდა თუ არა თანამზრახველები თვითმკვლელ ტერორისტს.
დიდ ბრიტანეთში კი, ქვეყნის პრემიერ-მინისტრის გადაწყვეტილებით, ტერორისტული საფრთხის დონე კრიტიკულამდე იზრდება.
ტერეზა მეი აცხადებს, რომ არ არის გამორიცხული, ქვეყანაში ადამიანთა ჯგუფი იმყოფებოდეს, რომელიც მანჩესტერში განხორციელებულ თავდასხმასთან არის კავშირში.
ქვეყანაში უსაფრთხოების ზომები გაამკაცრეს. პოლიციასთან ერთად ქუჩებში პატრულირებას სამხედრო პირებიც განახორციელებენ.
მანჩესტერ არენაზე მომხდარ თავდასხმას 22 ადამიანის სიცოცხლე ემსხვერპლა, 59 კი დაშავდა. სოლიდარობის ნიშნად, მსოფლიოს ღირსშესანიშნაობები ბრიტანეთის დროშის ფერებში განათდა.