საზღვარგარეთის პირველი ვიზიტის ფარგლებში, აშშ-ის პრეზიდენტი ვატიკანში რომის პაპს შეხვდა. ფრანცისკე პირველმა თავდაპირველად დონალდ ტრამპი მეუღლესთან ერთად მიიღო, შემდეგ კი მათ ამერიკის ოფიციალური დელეგაციის წევრებიც შეუერთდნენ.
ვიზიტის საქმიანი ნაწილის დასრულების შემდეგ, აშშ-ის დელეგაცია სიქსტის კაპელას და წმინდა პეტრეს ტაძარს მოინახულებს. აშშ-ის პრეზიდენტსა და რომის პაპს მიგრანტებისა და კლიმატური ცვლილებების საკითხებზე განსხვავებული პოზიცია აქვთ.
წინასაარჩევნო კამპანიის დროს, დონალდ ტრამპის მიერ მექსიკის საზღვარზე კედლის მშენებლობის იდეის განცხადების შემდეგ, რომის პაპმა განაცხადა, რომ ხიდების ნაცვლად კედლების მშენებლობა არაქრისტიანულია. პონტიფიკოსის განცხადებას მაშინ კრიტიკითვე უპასუხა ტრამპმა.
13 მაისს პორტუგალიაში ვიზიტისას რომის პაპმა აღნიშნა, რომ აშშ-ის პრეზიდენტთან ღიად ისაუბრებდა და მას ყურადღებით მოუსმენდა.