აჭარის ტურიზმის დეპარტამენტმა 15 მაისიდან საქართველოს მასშტაბით კრეატიული მარკეტინგული კამპანია დაიწყო, რომლის მთავარი მიზანი შიდა ტურისტებში აჭარაში დასვენებისა და მოგზაურობის წახალისებაა.

როგორც საზოგადოებრივს ტურიზმის დეპარტამენტიდან აცნობეს, აღნიშნული რეკლამის ფარგლებში, დედაქალაქსა და თბილისი-ბათუმის ცენტრალურ მაგისტრალზე განთავსდა ბილბორდები ზღვასთან ასოცირებული გრაფიკული გამოსახულებებითა და წარწერით „365 კილომეტრი ზაფხულამდე“, რითაც შიდა ტურისტებს კიდევ ერთხელ შეახსენებენ, საიდან იწყება „ნამდვილი“ ზაფხული.

ბანერებზე მითითებული კილომეტრების აღმნიშვნელი ციფრები ბათუმთან მიახლოებასთან ერთად მცირდება. მაგალითად, გურიის გზატკეცილზე შეგხვდებათ წარწერა - „125 კილომეტრი ზაფხულამდე“.

გარდა ამისა, თბილისის მასშტაბით, ავტობუსის 11 ცენტრალური მოსაცდელი ზღვისა და მასთან ასოცირებული გამოსახულებებით შეიფუთა. მათგან რამდენიმე მოსაცდელზე (ჭავჭავაძის 44, ჭავჭავაძისა და ყიფშიძის კვეთა, სპორტის სასახლე) კი ტურისტებს „ინტერაქტიული“ სასწორი ელოდებათ, რომელიც მომხმარებელს მათი წონის შესახებ ინფორმაციის მიწოდების ნაცვლად, კრეატიული ფრაზებით ასაჩუქრებს და აჭარაში დასვენებისკენ მოუწოდებს.

ტურიზმის დეპარტამენტის ინფორმაციით, კრეატიული ფრაზის შინაარსი დამოკიდებულია მომხმარებლის წონაზე.

ავტობუსის გაჩერებებზე ე.წ. ინტერაქტიულ სასწორზე შეიძლება წაიკითხოთ ისეთი კრეატიული ლექსები, როგორებიცაა:

თუკი სასწორი იმედს გიცრუებს,

არ ჩამოყარო მაინც ყურები.

აქ, აჭარაში შენთვის მზადდება

ცომგამოცლილი ხაჭაპურები.

თუ უმადობა გაშინებს

და ვერ იმატებ წონაში,

იცოდე: ცურვა აშიებს

ჩვენს საკურორტო ზონაში.

როცა პრობლემა გაქვს წონის,

ნუ დაჯდები დიეტაზე,

ამ დროს ერთი გზაა სწორი: -

უმალ გამოსწიე ზღვაზე.

ჩამოდი აჭარაში და

გქონდეს გახდომის იმედი,

შავი ზღვის სანაპიროზე

იარე ველოსიპედით.

გარდა ამისა, თავისუფლების მოედანსა და თამარაშვილი-უნივერსიტეტის ქუჩების გადაკვეთაზე, დიდ მონიტორებზე აჭარის სარეკლამო ვიდეოკლიპები გადის. ივნისის ბოლოდან, აღნიშნულ მონიტორებზე აჭარის ტურისტული შესაძლებლობების ამსახველ ახალ საიმიჯო ვიდეოკლიპს გაუშვებენ.

შიდა ტურიზმის პოპულარიზაცია აღნიშნული მარკეტინგული კამპანიით დედაქალაქიდან დაიწყო, თუმცა ის აჭარაში გაგრძელდება.

25 ივნისიდან, ბათუმსა და ქობულეთში მყოფ ტურისტებს მთიანი აჭარის ტურისტული ღირსშესანიშნაობებისა და დაცული ტერიტორიების ფოტოები სარეკლამო ბილბორდებზე ყველა ცენტრალურ მაგისტრალსა და ქალაქში დახვდებათ.

აღნიშნული სარეკლამო აქტივობით, აჭარის ტურიზმის დეპარტამენტი რეგიონში მყოფ ტურისტებს, ზღვაზე დასვენების გარდა, მთიან აჭარაში მოგზაურობისკენ მოუწოდებს.

ტურიზმის დეპარტამენტი, შიდა ტურიზმის პოპულარიზაციის მიზნით, მასშტაბურ ონლაინრეკლამას ივნისიდან დაიწყებს.

გარდა შიდა ტურიზმის წახალისებისა, აჭარის ტურიზმის დეპარტამენტი საერთაშორისო ბაზარზე უპრეცედენტო მასშტაბის სარეკლამო კამპანიას იწყებს, რომელიც აჭარის შესახებ სარეკლამო კამპანიას 16 სამიზნე ქვეყანაში ითვალისწინებს (გერმანია, არაბეთის გაერთიანებული საამიროები, საუდის არაბეთი, ლატვია, ესტონეთი, ლიტვა, ირანი, თურქეთი, სომხეთი, აზერბაიჯანი, უკრაინა, ბელორუსი, პოლონეთი, ყაზახეთი, ისრაელი, რუსეთი).