საზოგადოებრივი მაუწყებლის 2016 წლის ანგარიშს მოისმენენ დღეს განათლებისა და მეცნიერების კომიტეტში. ანგარიშს დეპუტატებს მაუწყებლის სამეურვეო საბჭოს თავმჯდომარე გააცნობს.

გრიგოლ გოგელიას განცხადებით, კომიტეტის წევრებს წარუდგენს ანგარიშს იმის შესახებ, თუ რა მიმართულებით გადაიდგა ნაბიჯები 2016 წელს, ასევე გოგელია ისაუბრებს იმ ცვლილებებზე და სიახლეებზე, რომელიც 2016 წელს დაიგეგმა და მიმდინარეობს მათი განხორციელება. მათ შორის გაერთიანებული საინფორმაციო სამსახურის შექმნაზე.

„ანგარიში ორი ძირითადი მიმართულებისგან შედგება. ეს გახლავთ ის შემოქმედებითი მიმართულება, რაც ვაწარმოეთ ჩვენ, რა სახის, რა ჟანრებში, რა რაოდენობით და მეორე ეს გახლავთ ის ორგანიზაციული, სტრუქტურული თუ სხვა სახის ცვლილებები, რომლებიც განვახორციელეთ 2016 წელს. ის უმნიშვნელოვანესი, ძირითადი პროექტი, რომელიც 2016 წელს დასრულდა და დაიწყო მისი განხორციელება, გახლავთ გაერთიანებული საინფორმაციო სამსახურის შექმნა და მათ შორის ის დადებითი მხარეები თუ პრობლემები, რომელმაც 2016 წელს იჩინა თავი - ეს არის ძირითადი საკითხები, რასაც წარვადგენთ პარლამენტის წინაშე“, - განაცხადა საკომიტეტო მოსმენის დაწყებამდე გრიგოლ გოგელიამ.

მისივე თქმით, ის კომიტეტის სხდომაზე დასვამს საკითხს აუცილებელ საკანონმდებლო ცვლილებებთან დაკავშირებითაც.

„ჩემი მხრიდან დავსვამ საკითხს, რომ გარკვეული საკანონმდებლო ცვლილებები, რაც არის აუცილებელად განსახორციელებელი, ხელი შეგვიწყოს ამ კომიტეტმაც, რათა განხორციელდეს. აქ იგულისხმება საკანონმდებლო მიმართულებით სხვადასხვა საკითხი, აქ არის შესყიდვების საკითხი, ბიუჯეტთან ურთიერთობის საკითხი და ასევე სხვა საკითხები, რომელთა მოგვარებაც აუცილებელია, რათა ეფექტურად იმუშაოს საზოგადოებრივმა მაუწყებელმა“, - განაცხადა საზოგადოებრივი მაუწყებლის სამეურვეო საბჭოს თავმჯდომარემ.