ადგილობრივ მოსახლეობას პირობას ვაძლევთ, რომ დამატებით იქნება შესწავლილი. ყველაფერი განხორციელდება ისე, რომ არანაირი პრობლემა არ შეექმნას ადგილობრივ მოსახლეობას, - ამის შესახებ განცხადება საქართველოს ვიცე-პრემიერმა, ენერგეტიკის მინისტრმა, კახი კალაძემ ხანდოს ხეობაში გააკეთა, სადაც ადგილობრივ მოსახლეობას ხვდება.
როგორც „მოამბის“ კორესპონდენტი ადგილიდან იტყობინება, კახი კალაძემ, ადგილობრივ მოსახლეობასთან ერთად, ის ტერიტორიები დაათვალიერა, სადაც მათი თქმით, მეწყერსაშიში ზონებია. ამ წუთებში კი ერთ-ერთი ადგილობრივის სახლში მედიისთვის დახურული შეხვედრა მიმდინარეობს.
როგორც კალაძემ ტერიტორიის დათვალიერების შემდეგ განაცხადა, ადგილზე შესაბამისი ჯგუფებია ჩაყვანილი, მათ შორის გეოლოგები, მოხდება ვითარების დამატებითი შესწავლა და სამუშაოები ისე განხორციელდება, რომ მოსახლეობას პრობლემა არ შეექმნას.
„დღეს ვნახეთ კონკრეტულად ის წერტილები, რომლებიც პრობლემურია ადგილობრივი მოსახლეობისთვის. კიდევ გაგრძელდება შესაბამისი სამუშაოები კვლევების თვალსაზრისით. ჩვენ აქ ჩამოვიყვანეთ ჯგუფები. ეს არის კონკრეტული გერმანული კომპანია, რომელმაც გააკეთა პროექტი ჩამოყვანილი. გვყავს გეოლოგები, რომელთაც გამაგრებითი სამუშაოები და ექსპერტიზა უნდა ჩაატარონ. კიდევ უნდა ვნახოთ რამდენიმე ადგილი და შესაბამისად გავივლით ყველაფერს. ადგილობრივ მოსახლეობას პირობას ვაძლევთ, რომ დამატებით იქნება შესწავლილი. ყველაფერი განხორციელდება ისე, რომ არანაირი პრობლემა არ შეექმნას ადგილობრივ მოსახლეობას. რა და როგორ, ამას მოსახლეობასთან ერთად გავივლით“, - აღნიშნა კახი კალაძემ.
ადგილობრივების განცხადებით, გზა, სადაც მაღალი ძაბვის ელექტროგადამცემმა ხაზებმა უნდა გაიაროს მეწყერსაშიშია და ელექტროგადამცემი ხაზების მშენებლობის შემთხვევაში მათ სახლებს საფრთხე ემუქრება.