შეიძლება იტალიაში პრეზიდენტს სხვანაირად ირჩევენ, მადაგასკარში კიდევ სხვანაირად, მაგრამ ამ მოდელებს შორის განმასხვავებელი და პასუხზე კითხვის გამცემი ჩემთვის არის - როგორ უნდა ქართველ ხალხს, - ეს განცხადება საქართველოს პრეზიდენტმა, გიორგი მარგველაშვილმა, კამპანიის „კონსტიტუცია ყველასია“ ფარგლებში, პროფკავშირების წარმომადგენლებთან შეხვედრისას გააკეთა.
დღევანდელი შეხვედრის მთავარი თემაა კონსტიტუციაში არსებული შრომითი უფლებები და შრომის უსაფრთხოების საკითხები. გიორგი მარგველაშვილმა პრეზიდენტის არჩევის წესზე, საარჩევნო სისტემასა და კონსტიტუციაში არსებულ შრომით უფლებებზე გაამახვილა ყურადღება.
„მე მჯერა, რომ ამ ქვეყანაში მმართველობის ყველაზე ადეკვატური ფორმა არის დემოკრატია და ეს ნიშნავს, რომ ყველა მოქალაქე რაღაც ფორმით უნდა მონაწილეობდეს სახელმწიფოს მართვაში. როდესაც ვამბობ, რომ ამის მჯერა, ეს ნიშნავს, რომ ამ ნაწილში ვხედავ პასუხებს კითხვებზე. მე ვხედავ, რომ ბევრ კითხვაზე პასუხი, რომელიც ჩვენ დღეს შეიძლება არ ვიცით, საზოგადოებამ უნდა გასცეს და არა რომელიღაც ცალკე მდგარმა ადამიანმა, რომელსაც დიდი წარმოდგენა ჰქონდეს. ეს პასუხები უნდა იქნეს მოძიებული არა ერთხელ, არამედ მუდმივად“, - აღნიშნა გიორგი მარგველაშვილმა.
საქართველოს პრეზიდენტის განცხადებით, პრეზიდენტის არჩევის წესი საქართველოს მოსახლეობის სურვილის მიხედვით უნდა განისაზღვროს, მიუხედავად იმისა, თუ რა გამოცდილება არსებობს სხვადასხვა ქვეყანაში.
„დემოკრატია ჩვენი მმართველობის ფორმაა. იქ, სადაც გაქვს შესაძლებლობა, მაქსიმალურად უფლებამოსილება უნდა გადასცე ხალხს. ყველა უფლება უნდა გადასცე ხალხს და მათ მისცე უფლება გადაწყვიტონ, მათ მისცე თავისუფლება გადაწყვიტონ. ეს ნიშნავს იმასაც, რომ მათ მისცე უფლება შეეშალოთ რაღაც გადაწყვეტილებები, რადგან თავისუფლება თავისთავად გულისხმობს შეცდომის უფლებასაც. ამ კუთხიდან ვუყურებ ყველაფერს, რაზეც დღეს ვსაუბრობთ კონსტიტუციასთან მიმართებაში. როგორ უნდა ირჩეოდეს პრეზიდენტი. მე ვამბობ, რომ ისე უნდა ირჩეოდეს, როგორც ქართველ ხალხს უნდა. შეიძლება იტალიაში სხვანაირად ირჩევენ, მადაგასკარში კიდევ სხვანაირად, მაგრამ ამ მოდელებს შორის განმასხვავებელი და პასუხზე კითხვის გამცემი ჩემთვის არის როგორ უნდა ქართველ ხალხს. მთავრდება ჩემთვის კითხვა, რადგან პასუხს თუ მოვიძიებ, ეს პასუხი იქნება ჩვენთვის ყველაზე ჭეშმარიტი“, - განაცხადა გიორგი მარგველაშვილმა.
პრეზიდენტმა შეშფოთება გამოთქვა იმის გამო, რომ ქვეყნის მთავარი კანონის შემუშავების პროცესში პროფესიული კავშირების გაერთიანებას ჩართვის საშუალება არ მიეცა.
შეხვედრა წუთიერი დუმილით დაიწყო. პროფკავშირების თავმჯდომარემ რამდენიმე კვირის წინ ტყიბულში გარდაცვლილი მეშახტეები გაიხსენა.
ამ დროისთვის შეხვედრა კითხვა-პასუხის რეჟიმში მიმდინარეობს.