26 მაისს საზოგადოებრივი მაუწყებელი საგანგებო რეჟიმში იმუშავებს. პირველი არხისა და საზოგადოებრივი რადიოს ეთერში საქართველოს დამოუკიდებლობის დღისადმი მიძღვნილი ღონისძიებები მთელი დღის განმავლობაში გადაიცემა.

დილის 11:00 საათიდან მაუწყებლობას საზოგადოებრივის ტელევიზია, რადიო და ვებგვერდი რუსთაველის გამზირიდან უწყვეტი ეთერის რეჟიმში განახორციელებს.

რუსთაველზე ოპერის თეატრის მოპირდაპირე მხარეს, პირველად განთავსდება საზოგადოებრივი მაუწყებლის პავილიონი. პავილიონიდან ეთერში საინფორმაციო პროგრამა „მოამბის“ დღის გამოშვება 11:00 საათიდან გავა. 13:30 საათზე კი განსხვავებული ფორმატით, რუსთაველის გამზირზე დამონტაჟებული სპეციალური სტუდიიდან მაყურებელს მაუწყებლის სახეები ნინო ზაუტაშვილი, რატი ამაღლობელი და ბასა ჯანიკაშვილი მიესალმებიან.

რუსთაველის გამზირზე დამონტაჟებული პავილიონიდან საზოგადოებრივი 17:00 საათამდე იმაუწყებლებს. ეთერში გავა რამდენიმე გადაცემა, მათ შორის „სიტყვების თამაში“, სადაც საზოგადოება შეძლებს „ვეფხისტყაოსნის“ მიხედვით მომზადებული კროსვორდი შეავსოს და ინტელექტუალურ თამაშებში ჩაებას.

გადაცემებში მოწვეულ სტუმრებთან ერთად, ის ადამიანებიც მიიღებენ მონაწილეობას, ვინც საზოგადოებრივის პავილიონს ესტუმრება და სურვილს გამოთქვამს, მონაწილეობა მიიღოს პროექტში „მე, შენ, ჩვენ ვკითხულობთ „ვეფხისტყაოსანს“.

„ის, რაც გვაერთიანებს“ - ამ სლოგანით მომზადდა სპეციალური სტუდია, სადაც მსურველები ჩაწერენ სტროფებს რუსთაველის პოემიდან. ვიდეორგოლები კი პირველი საზოგადოებრივის ვებგვერდზე განთავსდება.