გზა დამოუკიდებლობიდან თავისუფლებისაკენ ჯერ კიდევ გასავლელია. თავისუფალი არის ქვეყანა, რომელიც ეფუძნება თავისუფალ საზოგადოებას და თავისუფალია საზოგადოება, როდესაც მისი ყოველი წევრი არის თავისუფალი, - ამ სიტყვებით მიმართა საქართველოს პრეზიდენტმა გიორგი მარგველაშვილმა 26 მაისისადმი მიძღვნილ ღონისძიებაზე სიტყვით გამოსვლისას.

გიორგი მარგველაშვილმა ისაუბრა საქართველოს ევროატლანტიკურ კურსზე და განაცხადა, რომ საქართველო მოთმინებით დაელოდება იმ წუთებს, როდესაც ევროკავშირი და ნატო კიდევ უფრო გაძლიერდება საქართველოს თავის რიგებში გაწევრიანებით.

„მინდა, ხელახლა დავადასტურო, რომ ის შეკვეთა, რომელსაც ქართული საზოგადოება წლების განმავლობაში აძლევს ქართულ სახელმწიფოს, შეკვეთა, რომელიც ჩვენს ევროპულ და ევროატლანტიკურ ინტეგრაციას გულისხმობს, იქნება წარმატებით მიღწეული. ქართული სახელმწიფო მტკიცედ დგას ამ გზაზე და ჩვენ მოთმინებით ველოდებით იმ წუთებს, იმ მომენტს, როდესაც ევროკავშირი, ასევე ნატო გახდეს კიდევ უფრო ძლიერი, კიდევ უფრო მტკიცე საქართველოს თავის რიგებში გაწევრიანებით. კიდევ ერთხელ მინდა დავადასტურო ქართველი ხალხის ურყევი ნება, ააშენოს ძლიერი, დემოკრატიული სახელმწიფო. დემოკრატიული სახელმწიფო, რომელიც ჩვენს კულტურას, ჩვენს საზოგადოებას მისცემდა შესაბამის პოლიტიკურ ინსტიტუტებს, გააძლიერებდა ჩვენ პოლიტიკურ მრავალფეროვნებას და შექმნიდა ჭეშმარიტად მრავალი სხვადასხვა ხმისგან ერთიან პოლიტიკურ პროცესს. ეს მიზნები არის გაერთიანებული და ერთმანეთის შემავსებელი, ეს მიზნები აერთიანებს, ერთიან სწრაფვას ჩვენი ერისა. მაგრამ ის რაც არის კიდევ უფრო მნიშვნელოვანი და რაც ყველაფერ ამას აძლევს აზრს, არის ჩვენი სწრაფვა თავისუფლებისაკენ.“ - განაცხადა საქართველოს პრეზიდენტმა.

პრეზიდენტმა ისაუბრა დამოუკიდებლობისა და თავისუფლების მნიშვნელობაზე და ამ საკითხზე საუბრისას საქართველოს უახლოესი ისტორიაც გაიხსენა.

„თავისუფალი არის ქვეყანა, რომელიც ეფუძნება თავისუფალ საზოგადოებას და თავისუფალია საზოგადოება, როდესაც მისი ყოველი წევრი არის თავისუფალი. თითოეული ინდივიდის თავისუფლება, თვითგამოხატვის თავისუფლება არის საწინდარი დემოკრატიული თავისუფალი, საქართველოს შექმნის. მაგრამ, საიდან იწყება თავისუფლება, თავისუფლება ძნელად არის მოსაპოვებელი, რადგან თავისუფლება პირველ რიგში, შენი თანამოქალაქის, საქართველოს სხვა მოქალაქის უფლებების აღიარებაშია. გეუბნებით, რომ არ არის ადამიანი თავისუფალი, რომელიც სხვა ადამიანის თავისუფლებას არ აღიარებს. ამიტომ იმათ, ვისაც თავისუფლება უმაღლეს ღირებულებად მიგაჩნიათ, ნუ იფიქრებთ იმის თაობაზე, დღეს ვის მოუგეთ, ან ვისზე უფრო ძლიერები ხართ, იფიქრეთ იმის თაობაზე, დღეს ვის გაუგეთ და ვინ დაიცავით. ასე იქმნება მთლიანი ერი, ასე შეუქმნიათ ჩვენი ძლიერი საქართველო ჩვენს წინაპრებს. როგორც მრავალხმოვნება ქართული სიმღერის თავის თავში აერთიანებს მრავალ სხვადასხვა ხმას, მაგრამ ეს ჰარმონიას ქმნის, ისევე საქართველოს თითოეული მოქალაქის ხმა უნდა ისმოდეს ჩვენი ერის განვითარებისა და უზენაესი ღირებულება მაშინ იქნება ყოველდღიურებაში განხორციელებული. ჩვენს ცოტა ხნის ისტორიასაც რომ გადავხედოთ დავინახავთ, რომ რამდენჯერაც გვითქვამს ჩვენი მოქალაქეებისათვის სიტყვა - „ჩავრცეხოთ“, „განვდევნოთ“, „არ გვინდა“ - იმდენჯერ ეს ძალიან ცუდად დაგბრუნებია. ამიტომ უზენაესი ღირებულება არის თავისუფლებაა. ეს სჯეროდათ ჩვენს წინაპრებს, ამის სჯერათ დღესაც და ასე განვაგრძობთ სვლას მომავალში. პოეტმა შეაჯამა ჩვენი წარსულიც და მომავალიც ასეთ ფრაზაში - „სჯობს მომავალში გადიდკაცებულს, თავისუფლების ძებნასი მკვდარი.“ დღეს როდესაც დამოუკიდებლობის აღდგენის დღეს ვზეიმობთ, მინდა, ქედი მოვიხადო იმ ადამიანების წინაშე, ვინც იარაღით ხელში, ბრძოლის ველზე, ან შეიძლება თავისი ცხოვრებისეული პირადი მაგალითით აჩვენა უზეაანესი ღირებულების მნიშვნელობა. დიდება მათ სულებს და სამარადისო ღირებულება. კიდევ ერთხელ გილოცავთ საქართველოს დამოუკიდებლობის დღეს და ღმერთი ფარავდეს ჩვენს სამშობლოს, საქართველოს.“ - განაცხადა სიტყვით გამოსვლისას საქართველოს პრეზიდენტმა.