საქართველოს იუსტიციის მინისტრმა თეა წულუკიანმა ახლად დაქორწინებულ წყვილს სპეციალური მოწმობა გადასცა.
რუსთაველზე, გარემოს დაცვის სამინისტროს წარმომადგენლების მიერ მოწყობილ მიჯნურთა ხეივანში ახალგაზრდა წყვილმა ხელი მოაწერა. ახალგაზრდებს ქორწინების მოწმობა იუსტიციის მინისტრმა თეა წულუკიანმა გადასცა.
სპეციალურად დღევანდელი დღისთვის დამზადებული მოწმობა „ვეფხისტყაოსნის“ თემატიკითაა გაფორმებული და მსგავს მოწმობას მხოლოდ დღეს დაქორწინებულ წყვილებს მისცემენ.
„დღეს ვზეიმობთ დამოუკიდებლობის დღეს და ყველას ვუსურვებ რომელ საქმესაც არ უნდა ვემსახურებოდეთ თავისი წვლილი შეეტანოს ამ დამოუკიდებლობის განმტკიცებაში. დღეს იუსტიციის სამინისტროს სამოქალაქო რეესტრმა, სერვისების განვითარების სააგენტომ ქორწინების სპეციალური მოწმობა გამოსცა. დღეს ვინც დაქორწინდება მას გადაეცემა სპეციალური მოწმობა, რომელზეც აღნიშნულია შოთას უკვდავი სიტყვები აფორიზმი "ლეკვი ლომისა სწორია, ძუ იყოს თუნდა ხვადია", რადგან ჩვენს ქვეყანაში ჯერ კიდევ იმ დროიდან, დღეს უკვე კანონით ადამიანები ქალები და კაცები იყვნენ თანასწორნი და თანასწორნი კანონის წინაშე. ძალიან მნიშვნელოვანია, რომ ახლად დაქორწინებულ წყვილებს ეს პირველივე წუთიდან ესმოდეთ, რომ ორივენი ჩვენი კონსტიტუციისა და სახელმწიფოს წინაშე არიან თანაბარნი“, - განაცხადა წულუკიანმა.