ორი სახელმწიფო ერთი იმედით – ამ ლოზუნგით 10 ათასზე მეტი ადამიანი თელ-ავივის ქუჩებში გამოვიდა. მასშტაბური დემონსტრაციის მონაწილეები ისრაელ-პალესტინის კონფლიქტის დარეგულირების იმედს გამოთქვამენ და ემხრობიან კონცეფციას - ორი სახელმწიფო ორი ერისთვის.

მათ მოთხოვნა არის 50 წლის წინ ოკუპირებული ტერიტორიების გათავისუფლება და პალესტინის სახელმწიფოს შექმნა, 1967 წლის საზღვრების მდგომარეობით.

დემონსტრაციის ორგანიზატორები არასამთავრობო ორგანიზაცია „მშვიდობა ახლა” და პოლიტიკური პარტიები „ავოდა” და „მერეცი” არიან. აქციის დროს ასევე გაჟღერდა პალესტინის ლიდერის, მაჰმუდ აბასის მიმართვაც. აქციაზე განცხადებები გააკეთეს ისრაელის პოლიტიკისა და კულტურის სფეროს წარმომადგენლებმაც.

ოპოზიციური მშრომელთა პარტიის ლიდერმა პრემიერ-მინისტრი ბენიამინ ნეთანიაჰუ იმ შანსის ხელიდან გაშვებაში დაადანაშაულა, რომელიც სამშვიდობო პროცესს წინ წაწევის საშუალებას მისცემდა.

ოპოზიციონერის თქმით, პრემიერს ცვლილებების, პირობის მიცემის, ინიციატივებისა და იმედის შიში აქვს.

საზოგადოებრივი გამოკითხვის მიხედვით, მოქალაქეთა 47 პროცენტი, „2 სახელმწიფო - 2 ერისთვის“ კონცეფციას ემხრობა, 39 პროცენტი მისი წინააღმდეგია, ხოლო 14 პროცენტი პასუხისგან თავს იკავებს.

1967 წლის 6-დღიანი ომის შედეგად ისრაელმა იორდანიას დასავლეთ სანაპირო და აღმოსავლეთ იერუსალიმი, ეგვიპტეს – სინაის ნახევარკუნძული და ღაზას სექტორი, სირიას კი გოლანი მაღლობი წაართვა.

ღაზას სექტორი ისრაელმა 2005 წელს დათმო, თუმცა ჰამასის მმართველობის ქვეშ მყოფი 2 მილიონიანი ანკლავი დღემდე ბლოკადაში რჩება.

სინაის ნახევარკუნძული ეგვიპტეს ორმხრივი სამშვიდობო ხელშეკრულების პირობებით დაუბრუნდა.

გოლანის მაღლობის საკითხი სირიაში სამოქალაქო ომის დაწყებამ გადაფარა.

მდინარე იორდანეს ოკუპირებული დასავლეთ სანაპირო და ანექსირებული აღმოსავლეთ იერუსალიმი, რომელიც 3 მონოთეისტური რელიგიის ცენტრად მიიჩნევა, დღემდე რჩება ისრაელ-პალესტინის კონფლიქტის მწვავე საკითხად, რომლის გადაჭრასაც უკვე ათეული წლებია მსოფლიო ლიდერები ცდილობენ.