უკრაინის კრიზისი და სირიის ომი, სავაჭრო-ეკონომიკური და კულტურული კავშირების გაძლიერება, ასევე ადამიანის უფლებები იყო განხილვის მთავარი თემები საფრანგეთისა და რუსეთის პრეზიდენტების შეხვედრაზე. ვერსალის სასახლეში გამართული შეხვედრის შემდეგ, პრეზიდენტებმა პრესკონფერენცია გამართეს. ემანუელ მაკრონმა ვლადიმერ პუტინთან შეხვედრა დადებითად შეაფასა და აღნიშნა, რომ მნიშვნელოვანი საკითხებზე მუშაობა რუსეთთან დიალოგის გარეშე დაუშვებელია.
მაკრონის თქმით, უკრაინის კრიზისის მოსაგვარებლად აუცილებელია დიალოგის „ნორმანდიული ფორმატით“ გაგრძელება. საფრანგეთის პრეზიდენტმა აღნიშნა, რომ პუტინთან ყველა საკითხზე ღიად ისაუბრა და დაინტერესებულია რუსეთთან თანამშრომლობის გაძლიერებით. თავის მხრივ, რუსეთის პრეზიდენტმა განაცხადა, რომ ორი ქვეყნის საერთო პრიორიტეტი ტერორიზმის წინააღმდეგ ბრძოლაა. პუტინის თქმით, რუსეთზე დაწესებული სანქციები პრობლემების მოგვარებას ვერ დაეხმარება. ემანუელ მაკრონმა და ვლადიმერ პუტინმა ვერსალში მდებარე დიდი ტრიანონის სასახლეში გამართეს შეხვედრა, სადაც 1717 წელს პეტრე პირველის საფრანგეთში ვიზიტთან დაკავშირებული გამოფენა იმართება. ვლადიმერ პუტინი საფრანგეთში ფრანგი კოლეგის მიწვევით იმყოფება.