ჩვენ გვყავს ძლიერი მხარდამჭერები და ნათელია, რომ ის ქვეყნები, რომლებსაც ძალიან მტკიცე პოზიცია აქვთ ნატო-სთან მიმართებაში, არიან ჩვენი ისეთი მტკიცე პარტნიორები, როგორიც არის მაგალითად პოლონეთი, - ამის შესახებ საქართველოს პრეზიდენტმა გიორგი მარგველაშვილმა პოლონეთის პრეზიდენტთან, ანდჟეი დუდასთან ერთად გამართულ პრესკონფერენციაზე განაცხადა.
როგორც გიორგი მარგველაშვილმა აღნიშნა, ნატო-ს მომავალი სამიტისთვის მზადება დაიწყო, ვიდრე ჩატარდებოდა მცირე სამიტი, რომელიც რამდენიმე დღის წინ გაიმართა.
"უშუალოდ მქონდა კონტაქტები ლიტვის, ლატვიის, სლოვაკეთის პრეზიდენტებთან. დღეს კი ამის შესაძლებლობა მომეცა პოლონეთის პრეზიდენტთან. მომავალი წლის განმავლობაში ჩვენ შევეცდებით ვესაუბროთ ყველა ჩვენს მხარდამჭერს, ასე ინდივიდუალურად, რაც შესაძლებლობა გვაქვს, მაგრამ ასევე შევეცდებით გავაერთიანოთ ის სულისკვეთება და მესიჯები, რაც უნდა იყოს წარმოდგენილი შემდეგ სამიტზე. ჩვენ გვყავს ქვეყნები ევროკავშირში და ნატო-ში, რომელთაც ძალიან კარგად ესმით სპეციფიკა არა მარტო საქართველოსი, არამედ საქართველოს მაგალითზე ესმით იმ გამოწვევების სპეციფიკა, რაც დგას ევროკავშირის, ნატო-ს წინაშე", - განაცხადა გიორგი მარგველაშვილმა.
მისივე თქმით, საქართველოს ჰყავს სერიოზული მხარდამჭერები ნატო-სა და ევროკავშირში, რომელთაც ესმით, რომ თუ ამ გამოწვევებს არ გაეცა ნათელი პასუხი სწორედ საქართველოს მაგალითზე, ეს გამოწვევები შეიძლება ბევრად უფრო სერიოზული იყოს მომავალში თავად ევროკავშირის და ნატო-სთვის.
"ასეთი მხარდამჭერები არის დიდი რესურსი საქართველოსნაირი ქვეყნებისთვის. მაშინ როდესაც პოლონეთი იბრძოდა ევროკავშირის და ნატოს წევრობისთვის, მაშინ პრეცედენტები მაინცდამაინც არ იყო, მათ გაიზიარეს ბევრად უფრო რთული გზა, მაშინ იმის პრეცედენტი, რომ ნატო ფართოვდება, ბევრად უფრო დაუშვებელი იყო თუნდაც პოლიტიკოსების აზროვნებაში. ჩვენ ვუყურებთ იმ გზას, რომელიც გაიარეს ჩვენმა პარტნიორებმა ბალტიისპირეთში და ცენტრალურ ევროპაში და ამ გზიდან ვიღებთ მაგალითებს. მაგრამ ისიც უნდა ვაღიაროთ, რომ ჩვენ კიდევ უფრო ძლიერები ვართ ამ გზაზე, რადგან გვყავს პოლონეთისნაირი, აღმოსავლეთ და ცენტრალური ევროპის ქვეყნებისნაირი მხარდამჭერები. პოლონეთს ასეთი მხარდამჭერები არ ყავდა. ჩვენ გვყავს არაერთი ქვეყანა, რომელიც სერიოზულად გვიჭერს მხარს და ჩვენ ეს უნდა გამოვიყენოთ, მოვახდინოთ ამ მხარდაჭერის კონსოლიდაცია", - განაცხადა მარგველაშვილმა.