„თავისუფალი დემოკრატები“ და „რესპუბლიკური პარტია“ 2017 წლის თვითმმართველობის არჩევნებისთვის საარჩევნო ბლოკს ქმნიან.
პარტიების ლიდერების თქმით, არჩევნებზე ერთიანი ხედვით და საერთო კანდიდატებით წარსდგებიან.
გადაწყვეტილება საარჩევნო ბლოკის შექმნის შესახებ დღეს საგანგებოდ გამართულ ბრიფინგზე შალვა შავგულიძემ და ხათუნა სამნიძემ განაცხადეს.
მათი განმარტებით, ორი პარტიის გაერთიანების საფუძველი იდეოლოგიური თანხვედრა და გარდა ამისა, ორ პარტიას შორის ხანგრძლივი პარტნიორობის გამოცდილებაა.
„თავისუფალმა დემოკრატებმა“ გადავწყვიტეთ ერთიანი სარჩევნო სიით წარვსდგეთ თვითმმართველობის არჩევნებზე ამომრჩევლის წინაშე. გარდა ამისა, ჩვენი მიზანია მომავალ საპარლამენტო არჩევნებში მმართველი პოლიტიკური ძალა, რომელმაც ამომრჩეველი მოატყუა, ჩამოვაცილოთ ხელისუფლებას“, - განაცხადა შალვა შავგულიძემ.
როგორც ხათუნა სამნიძემ განაცხადა, აუცილებელია ქვეყანაში ცვლილებები განხორციელდეს.
„ეს ერთობა განსაკუთრებით მნიშვნელოვანია განსაკუთრებით დღეს, იქიდან გამომდინარე, რომ დღესაც ქვეყანა იგივე გამოწვევების წინაშე დგას. ამ რეალობის შესაცვლელად გავერთიანდით ერთ ბლოკად. ჩვენ გვინდა შევთავაზოთ ჩვენს საზოგადოებას თავისუფალი სივრცე. ჩვენი საარჩევნო სია ღიაა საქართველოს თითოეული მოქალაქისთვის. უპასუსხისმგებლო და არაფორმალური მმართვალობა უნდა დასრულდეს და აუცილებელია ქვეყანაში ცვლილებები დაიწყოს“, - განაცხადა ხათუნა სამნიძემ.