პოლკოვნიკ სერგო თეთრაძის სასამართლო პროცესი დახურულ რეჟიმში მიმდინარეობს.
თადარიგის პოლკოვნიკის სერგო თეთრაძის წამების ორგანიზებაში ბრალდებულ ბაჩო ახალაიას პროცესზე დღეს სამი მოწმის დაკითხვა იგეგმება.
ესენი არიან ბრალდების მხარის მოწმეები, რომლებიც თავდაცვის სამინისტროს ყოფილი თანამშრომლები არიან და პროკურორების მტკიცებით, ფლობენ ინფორმაციას ახალაიას მიერ თავდაცვის სამინისტროდან თანხების გაფლანგვასთან დაკავშირებით.
პროკურატურამ სასამართლო პროცესის დახრვა მოითხოვა, რადგან პროკურორების ინფორმაციით, საქმის ეს ეპიზოდი სახელმწიფო საიდუმლოებას წარმოადგენს. საქმე ეხება 60 000 ლარის გაფლანგვას.
"დღევანდელ პროცესზე გრძელდება მტკიცებულებათა წარმოდგენა, ბრალდება წარმოადგენს სამ მოწმეს. დღევანდელ პროცესზე კვლავ გაგრძელდება იმ ეპიზოდის განხილვა, რომელსაც ამ ეტაპზე განიხილავს სასამართლო და შესაბამისად ჩვენ კვლავ ვიშუამდგომლებთ სასამართლო პროცესის დახურვის თაობაზე, ვინაიდან მოწმეები სხდომაზე სასამართლოს მისცემენ ჩვენებას იმ ფაქტობრივი გარემოებების შესახებ, რომელიც დაცულია სახელმწიფო საიდუმლოების შესახებ საქართველოს კანონის შესაბამისად", - განაცხადა პროცესის დაწყებამდე პროკურორმა მაია ჯვარშეიშვილმა.
კითხვაზე რა კავშირი აქვს თანხების გაფლანგვას თეთრაძის საქმესთან პროკურორი პასუხობს, რომ კავშირი არსებობს, თუმცა მას ამ საკითხზე ღიად საუბარი არ შეუძლია.
"კავშირი ამასთან დაკავშირებით ნამდვილად არსებობს და ეს კავშირი არის წარმოდგენილი, თუმცა ამ საკითხზე საუბარი არ შემიძლია იქიდან გამომდინარე, რომ კანონმდებლობა ითვალისწინებს კონკრეტული ფაქტობრივი გარემოებები, რომელიც სახელმწიფოს საიდუმლოების შესახებ არის დაცული საზოგადოებისთვის უნდა იყოს დაფარული", - განაცხადა ჯვარშეიშვილმა.
პროცესის დახურვას არ დაეთანხმა დაცვის მხარე, თუმცა საქმის კონკრეტულ დეტალებზე არც ის საუბრობს, რადგან ამის უფლება არ აქვს, თუმცა მისი თქმით, სასამართლო პროცესზე დაცვის მხარე დაამტკიცებს, რომ ბაჩო ახალაიას თანხები არ გაუფლანგავს.
"ჩვენ მიგვაჩნია, რომ საჯაროობის პრინციპი მეტად მნიშვნელოვანია ჩვენთვის, აქედან გამომდინარე პროცესი არ უნდა დაიხუროს, ეს არ არის ვინმეს ღირსების შემლახველი საქმე, ეს ეხება კონკრეტულ პატარა ეპიზოდს, რა საიდუმლოც რაც პროკურატურას ბრიფინგზე ითქვა, აქედან გამომდინარე, ჩვენ არ ვეთანხმებით ამ შუამდგომლობას" - განაცხადა მალხაზ ველიჯანაშვილმა.
დღევანდელ სასამართლო პროცესს არ ესწრება თავად ბრალდებული თავდაცვის ყოფილი მინისტრი ბაჩო ახალაია.
თეთრაძის საქმის ამ ეპიზოდში, რომელიც წამების ორგანიზებასა და თანხების გაფლანგვას ეხება ახალაიას გარდა ბრალდებულები არიან თავდაცვის ყოფილი მინისტრის ყოფილი მოადგილე ნიკოლოზ ძიმცეიშვილი და ასევე სამხედრო პოლიციის უფროსის ყოფილი მოადგილე მეგის ქარდავა, რომელსაც თეთრაძის წამებაში მონაწილეობისთვის ცხრა წელი აქვს მისჯილი.