აშშ-მა ე.წ. ისლამური სახელმწიფოს წინააღმდეგ საბრძოლველად, სირიის ქალაქ რაქას გათავისუფლების მიზნით, ქურთი მებრძოლების იარაღით მომარაგება დაიწყო, ამის შესახებ ინფორმაციას უცხოური მედია ავრცელებს.

France24-ის ცნობით, პენტაგონის სპიკერმა მაიორმა ადრიან გალოვეიმ განაცხადა, რომ ქურთ მებრძოლებს აშშ-ის სამხედრო აღჭურვილობის მცირე ზომის იარაღი გადასცეს.

მედიასაშუალების ცნობით, აშშ-ის თავდაცვის უწყების წარმომადგენელმა, რომელმაც ვინაობა არ დაასახელა, აღნიშნა, რომ იარაღის მიწოდების პროცესი, პრეზიდენტ დონალდ ტრამპის ბრძანების საფუძველზე, ბოლო 24 საათია მიმდინარეობს.

როგორც France24-ი წერს, აშშ-ის ქმედებას თურქეთისგან საპასუხო რეაქცია ჯერ არ მოჰყოლია.

CNN-ის ინფორმაციით, ქურთების იარაღით მომარაგების საკითხს პენტაგონი დიდი ხნის განმავლობაში განიხილავდა, თუმცა მისი აღსრულება გადაიდო იმ მიზეზით, რომ ამ გადაწყვეტილებას ეწინააღმდეგებოდა თურქეთი.

როგორც CNN-ი წერს, თურქეთის ხელისუფლება ფიქრობს, რომ ქურთი მებრძოლები დაკავშირებული არიან ტერორისტულ ორგანიზაციასთან, რომელიც თურქეთს თავს ესხმის.

როგორც აშშ-ის თავდაცვის უწყების წარმომადგენლებმა განაცხადეს, მათ მჭიდრო კავშირი აქვთ თურქ კოლეგებთან, რათა დაარწმუნონ, რომ ქურთი მებრძოლების შეიარაღებასთან დაკავშირებით თურქეთს ნერვიულობის მიზეზი არ აქვს.


წყარო: CNN, France 24