ამერიკელი ჟურნალისტი რობინ ფორესტერ-ვოლკერი მენტალური პრობლემების მქონე ქართველების დასახმარებლად ალკატრასის კუნძულიდან სან ფრანცისკოს სანაპირომდე გაცურავს. „გაქცევა ალკატრასიდან“ - ასე ქვია აქციას, რომელში მონაწილეობასაც მსოფლიოს მასშტაბით უამრავი ადამიანი იღებს.

ამერიკელმა ჟურნალისტმა ეს გადაწყვეტილება მას შემდეგ მიიღო, რაც საკუთარი ბიძაშვილისაგან შემოთავაზება მიიღო. როგორ რობინ ფორესტერი საზოგადოებრივ მაუწყებელთან განმარტავს, მენტალური პრობლემების მქონე ადამიანების დახმარება მაშინ გადაწყვიტა, როცა შიზოფრენიით დაავადებულმა ბიძაშვილის შვილმა სიცოცხლე თვითმკვლელობით დაასრულა. ჟურნალისტი საქართველოში სამ წელზე მეტია, ცხოვრობს და ამბობს, რომ ქვეყანაში საკმარისი სერვისები და თანხები ამ ადამიანებისათვის არ მოიპოვება, ამიტომაც ფორესტერი აქციაში ჩაერთო და იმედი აქვს, რომ მიზნად დასახულ 15 ათასს დოლარს გამოიმუშავებს და საქართველოში მენტალური ჯანმრთელობის ხარისხის გაუმჯობესებაში მცირე წვლილს შეიტანს. თანხის ჩარიცხვა ნებისმიერ მსურველს ამ საიტის მეშვეობით შეუძლია, ამ დროისათვის ქართველების დასახმარებლად ჟურნალისტმა 4 ათას დოლარამდე შემოწირულობა მიიღო, თუმცა იმედოვნებს, რომ ალკატრასის გადაცურვის შემდეგ ანგარიშზე მეტი თანხა დაგროვდება.

„მე არ ვმონაწილეობ საქართველოს სახელით, მაგრამ ვმონაწილეობ საქართველოსთვის, რადგან მინდა გამოვიმუშაო თანხა მენტალური ჯანმრთელობის პრობლემების მქონე ქართველების დასახმარებლად. აქ ბევრი ადამიანს აწუხებს ეს პრობლემა, თუმცა საკმარისი სერვისები და თანხები მათ დასახმარებლად საქართველოში არ არის. გარდა ამისა, არსებობს გარკვეული სტიგმა საზოგადოების მხრიდან და ეს ადამიანები არიან გარიყულები, ეს არ ხდება მხოლოდ საქართველოში, პრობლემა დგას მსოფლიოს ბევრ ქვეყანაში.

მიზეზი, თუ რატომ ვაკეთებ მე ამ ყველაფერს, არის ჩემი ბიძაშვილის შვილი, რომელიც დაავადებული იყო შიზოფრენიით და 6 წლის წინ, თვითმკვლელობით დაასრულა სიცოცხლე. სწორედ ამის შემდეგ გადავწყვიტეთ მე და ჩემმა ბიძაშვილმა, რომ გვეცურა სხვების დასახმარებლად. ალკატრასის კუნძულიდან 2 კილომეტრ ნახევარი უნდა გავცურო სან ფრანცისკოს სანაპირომდე, ეს არ არის პატარა მანძილი, წყალი არის ძალიან ცივი, თუმცა ძალიან ბევრს ვვარჯიშობ და იმედი მაქვს, რომ შევძლებ. ამჯერად შემოწირულობის სახით 5000 დოლარამდე მაქვს შეგროვებული, თუმცა ჩემი მიზანი 15 ათასი დოლარის გამომუშავებაა, რათა საქართველოში გავაუმჯობესოთ მენტალური ჯანმრთელობის დონე“, - განმარტა რობინ ფორესტერ-ვოლკერმა.