მაკედონიის პარლამენტმა ქვეყნის ახალი მთავრობა დაამტკიცა. მას სათავეში სოციალ-დემოკრატიული პარტიის ლიდერი ზორან ზაევი ჩაუდგება.

კენჭისყრაზე 120-მანდატიანი პარლამენტიდან მთავრობის ფორმირებას 62-მა წევრმა დაუჭირა მხარი. მინისტრთა კაბინეტის განხილვის პროცესი კვირას დაიწყო და ოთხ დღეს გაგრძელდა, თუმცა ამ პროცესს წინ უძღოდა ხანგრძლივი პოლიტიკური კრიზისი, რომელიც 2016 წლის დეკემბრის არჩენების შემდეგ კიდევ უფრო გამწვავდა.

მაკედონიის პარლამენტის ახალი სპიკერი, ეთნიკურად ალბანელი თალეთ ჯაფერი ქვეყნის პრეზიდენტისგან მინისტრთა ახალი კაბინეტის ფორმირებისთვის მანდატის მინიჭებას მოითხოვდა, თუმცა პრეზიდენტი პროცესს აჭიანურებდა.

აღსანიშნავია, რომ საპარლამენტო არჩევნებში ყოფილმა მმართველმა „დემოკრატიულმა პარტიამ“ უმრავლესობის ფორმირება ვერ შეძლო, რითაც ოპოზიციურმა ძალებმა ისარგებლეს და „სოციალ-დემოკრატებისა“ და სამი ალბანური პარტიისგან კოალიცია ჩამოაყალიბეს. ამ კოალიციამ კი სპიკერად სწორედ თალეთ ჯაფერი აირჩია, რასაც საკანონმდებლო ორგანოში დაპირისპირება მოჰყვა.

წყარო: Reuters