ევროკავშირი და ჩინეთი, კლიმატური ცვლილებების პრობლემის დაძლევას, ერთიანი ძალსიხმევით შეეცდებიან - ეს გადაწყვეტილება მხარეებმა პარიზის შეთანხმებიდან, შეერთებული შტატების შესაძლო გასვლით გამოწვეული რისკების გასანეიტრალებლად მიიღეს. გადაწყვეტილების დეტალებს, რომლის ოფიციალური ვერსიაც „ფინანეშელ ტაიმსმა“ ექსკლუზიურად მოიპოვა, მხარეები პარასკევს დაგეგმილ ევროკავშირის ლიდერებისა და ჩინეთის პრემიერის სამიტზე გაასაჯაროებენ. შეერთებული შტატების პრეზიდენტი დონალდ ტრამპი დღეს მიიღებს საბოლოო გადაწყვეტილებას პარიზის პაქტში შტატების ყოფნა-არყოფნის თაობაზე, რამაც მსოფლიო საზოგადოების შეშფოთება გამოიწვია, თვით ამერიკის ბიზნეს-წრეების და ტრამპის მომხრეთა ნაწილის ჩათვლით.