ვინც მოკლა, ის გაუშვეს და მე მიჭერენ, - განაცხადა სააპელაციო სასამართლოში რეპლიკით სარგებლობისას ზურაბ ვაზაგაშვილისა და ალექსანდრე ხუბულოვის განზრახ მკვლელობაში ბრალდებულმა, გიორგი ცააძემ.

მისი რეპლიკა ხმაურით გაგრძელდა. ცააძემ მოსამართლეთა კოლეგიას მიუთითა, რომ რეალურად სროლა განახორციელეს სპეცრაზმელებმა, რომლებიც პროკურატურამ, 109-ე მუხლით ბრალდების მიუხედავად, გაათავისუფლა.

დღესვე რეპლიკით ისარგებლა კიდევ ერთმა ბრალდებულმა, ირაკლი ფირცხალავამ. „პროკურორები ცდილობენ, ტყუილები შემოგაპარონ“, - მიმართა მოსამართლეებს ბრალდებულმა.

მისი თქმით, პროკურატურამ წარმოადგინა „თავხედურად“ ყალბი დოკუმენტები და სხვა მტკიცებულებები.

„ამ დოკუმენტებით, გიორგი ცააძე დაიჭირეს. არცერთი მოწმე არ ამბობს, რომ გიორგი ცააძე მივიდა და მოკლა ვინმე. არცერთ საქმეში, რომელიც განგიხილავთ, არ იქნება დადგენილი, სად მიდიოდნენ ესენი. გამოძიებამ ეს ვერ დაადგინა და რა ველაპარაკო იმ გამოძიებას, რომელმაც ესეც ვერ დაადგინა“, - განაცხადა ირაკლი ფირცხალავამ.

მისი თქმით, ერთ-ერთი მოწმე ჯაბა შარანგიამ დაკითხვისას თქვა, რომ ხუბულოვის თანასაკნელი იყო, თუმცა დადგინდა, რომ შარანგია იმ დროს, რა პერიოდიც მიუთითა, არ ყოფილა პატიმარი.

„კიდევ ერთხელ გამოავლინეს პროკურორებმა არაკომპეტენტურობა ან ცდილობენ თქვენს მოტყუებას“, - განაცხადა ფირცხალავამ მოსამართლეების მისამართით.

გიორგი ცააძესა და ირაკლი ფირცხალავას განზრახ მკვლელობის ბრალდებით, 12-12 წლით თავისუფლების აღკვეთა მიესაჯათ.

ამ ეტაპზე საქმეს სააპელაციო სასამართლო განიხილავს. საქმის განხილვა 9 ივნისს გაგრძელდება.

2015 წლის 30 ოქტომბერს, თბილისის საქალაქო სასამართლოს მოსამართლე ბადრი კოჭლამაზაშვილმა ე.წ. კორტების საქმეზე დაკავებულებს ირაკლი ფირცხალავას, გიორგი ცააძეს, კახაბერ ნაკანსა და ლევან ბეროძეს გამამატყუნებელი განაჩენი გამოუტანა.