ე.წ ფოტოგრაფების საქმეზე დღეს ბრალდების 6 მოწმე დაიკითხა. ექვსივე მათგანი 2011 წელს გლდანის #8 სასჯელაღსრულების დაწესებულებაში მუშაობდა. მათ შორის ერთ-ერთი მოწმე იყო ალექსანდრე ჯანჯღავა, რომელიც ამ საქმეზე ბრალდებული, მერვე დაწესებულების ყოფილი ხელმძღვანელის ალექსანდრე მუხაძის მოადგილე იყო.
მისი თქმით, 2011 წელს დაპატიმრებული ფოტოგრაფები განსაკუთრებულ კონტროლზე ჰყავდათ აყვანილი, მათ საკანში არ ქრებოდა შუქი და ხშირად მიდიოდნენ კონტრდაზვერვის თანამშრომლები.
მოწმეებმა ასევე განაცხადეს, რომ არასამუშაო საათებში პატიმრები საკნიდან გაჰყავდათ და ადმინისტრაციულ შენობაში ციხის ხელმძღვანელს ახვედრებდნენ.
ე.წ ფოტოგრაფების საქმე მტკიცებულებების გამოკვლევის ეტაპზეა. ამ საქმეზე დაპატიმრებულია დავით დევნოზაშვილი, რომელიც 2011 წელს კონტრდაზვერვის თანამშრომელი იყო.
ასევე პასუხისგებაშია მიცემული გლდანის მერვე სასჯელაღსრულების დაწესებულების ყოფილი ხელმძღვანელი ალექსანდრე მუხაძე, რომელიც ამჟამად წითელი ცირკულარით იძებნება.