ე.წ. ისლამური სახელმწიფოს ერთ-ერთი ლიდერი თურქი ალ-ბინალი ლიკვიდირებულია, - ამის შესახებ ინფორმაციას, არაბულ წყაროებზე დაყრდნობით, NBC ავრცელებს.

ბაჰრეინელი იმამი, თურქი ალ-ბინალი, რომელიც თვითგამოცხადებული ისლამური სახელმწიფოს, იგივე დაეშის ერთ-ერთ სულიერ ლიდერად მიიჩნევა, სირიაში, რაქას სიახლოვეს ამერიკის შეერთებული შტატების ავიაიერიშს ემსხვერპლა.

NBC-ის ინფორმაცია პენტაგონს ამ დრომდე არ დაუდასტურებია, თუმცა ამერიკული ტელეკომპანია თავდაცვის უწყებაში ანონიმურ წყაროზე დაყრდნობით წერს, რომ ალ-ბინალი და კიდევ რამდენიმე ჯიჰადისტი ავიაიერიშის დროს დაიღუპნენ.

ბაჰრეინელი სასულიერო პირი თურქი ალ-ბინალი დაეშში ქალებითა და ბავშვებით ვაჭრობის ერთ-ერთი ინიციატორი იყო. მისი გადაწყვეტილების თანახმად, 2014 წლიდან დღემდე 3000-ზე მეტი ქალი და მოზარდი გოგო დაეშის ტყვეობაში იმყოფება, ისინი სექსუალური ექსპოლატაციის მსხვერპლი არიან.

NBC-ის ინფორმაციით, ალ-ბინალიმ, რომელსაც განათლება დუბაის უნივერსიტეტში აქვს მიღებული, ოჯახი 2014 წელს მიატოვა და ერაყისა და სირიის თვითგამოცხადებული ისლამური სახელმწიფოს რიგებს შეუერთდა.