კარდიფში ჩემპიონთა ლიგის 2016/17 წლების სეზონის ფინალში მადრიდის „რეალმა“ ტურინის „იუვენტუსი“ ანგარიშით 4:1 დაამარცხა.

მატჩმა იმედები გაამართლა - შეხვედრა ორმხრივი შეტევებით წარიმართა.

ანგარიში კრიშტიანუ რონალდუმ გახსნა, პორტუგალიელმა მე-20 წუთზე კარვახალის პასის შემდეგ ბუფონისგნ მარჯვენა კუთხეში ზუსტად დაარტყა, 7 წუთში ტურინელთა კომბინაციას საჯარიმოში ჩაწოდება მოყვა, იგუაინმა ახლოს მდგარ მარიო მანჯუკიჩს მიაწოდა, მან კი ულამაზესი დარტყმით ანგარიში გაათანაბრა 1:1.

მეორე ტაიმში ესპანურმა გრანდმა დიდი სათამაშო უპირატესობა მოიპოვა და 61-ე წუთზე კაზემირომ შორეული დარტყმით კვლავ დააწინაურა "რეალი", ზუსტად 3 წუთში კი, რონალდუმ კიდევ უფრო განამტკიცა მადრიდელთა უპირატესობა - 3:1. მატჩის ბოლო წუთზე, იტალიელთა განადგურებას წერტილი მარკო ასენსიომ დაუსვა 4:1.

ამ გამარჯვებით მადრიდის "რეალმა" ევროპის მთავარი საკლუბო ტიტული მე-12-ედ მოიპოვა და საკუთარი რეკორდი გააუმჯობესა, ესპანელებმა კიდევ ერთი უპრეცედენტო მოვლენა დააფიქსირეს, პირველად ჩემპიონთა ლიგის ისტორიაში კლუბმა შესძლო ამ ტურნირის ზედიზედ ორჯერ მოგება.

ტურინულმა კლუბმა მეშვიდე ფინალი წააგო, ბოლო ხუთ ფინალში მათ ზედიზედ მეხუთედ წააგეს, მათ შორის უკვე მეორედ "რეალთან".