აშშ-ის სახელმწიფო დეპარტამენტი აზერბაიჯანელი ჟურნალისტის აფგან მუხტარლის საქმეზე განცხადებას ავრცელებს, სადაც სრულყოფილი, გამჭვირვალე და დროული გამოძიების ჩატარების აუცილებლობას მიუთითებს.

„აშშ-ის სახელმწიფო დეპარტამენტი ძალიან არის შეწუხებული, რომ გავრცელებული ინფორმაციით, 30 მაისს, საქართველოში, თბილისში, გაიტაცეს აზერბაიჯანელი ჟურნალისტი აფგან მუხტარლი, ხოლო შემდეგ ის აზერბაიჯანში დააკავეს.

ჩვენ ასევე აღშფოთებულები ვართ, რომ 25 მაისს, აზერბაიჯანში, დააპატიმრეს ეროვნული ფრონტის თავმჯდომარის მოადგილე გოზალ ბაირამლი.

მოვუწოდებთ აზერბაიჯანის ხელისუფლებას, გაათავისუფლოს აღნიშნული თავისუფლებააღკვეთილი პირები, რათა მათ ისარგებლონ ფუნდამენტური თავისუფლებებით, საერთაშორისო და ეუთოს შეთანხმებების შესაბამისად.

თვალს ვადევნებთ საქართველოში მიმდინარე გამოძიებას მუხტარლის საქმესთან დაკავშირებით. ჩვენი მოწოდებაა, რომ გამოძიება იყოს სრულყოფილი, გამჭვირვალე და დროული, - აღნიშნულია აშშ-ის სახელმწიფო დეპარტამენტის განცხადებაში.

აზერბაიჯანელი ჟურნალისტის აფგან მუხტარლის ოჯახმა 29 მაისს განაცხადა, რომ მუხტარლი გაუჩინარდა. მოგვიანებით, გაირკვა, რომ ის ბაქოში, სახელმწიფო საზღვრის სამსახურის საგამოძიებო განყოფილებაში იმყოფებოდა.

აზერბაიჯანის პროკურატურის განცხადებით, აფგან მუხტარლიმ საზღვარი გამშვები პუნქტის გვერდის ავლით, პირადობის მოწმობის გარეშე გადაკვეთა.

ადვოკატის ინფორმაციით, მუხტარლის ბრალად წაუყენეს საზღვრის უკანონოდ გადაკვეთა, კონტრაბანდა, სამართალდამცავებისათვის წინააღმდეგობის გაწევა (სისხლის სამართლის კოდექსის 318.1, 206.1 და 315.2 მუხლები). მას სასამართლომ სამთვიანი წინასწარი პატიმრობა შეუფარდა.