მადრიდის „რეალი“ ჩემპიონთა ლიგის გამარჯვებულია. სამეფო კლუბმა, რამდენიმე წუთის წინ დასრულებულ ფინალურ შეხვედრაში, ტურინის „იუვენტუსი“ ანგარიშით 4-1 დაამარცხა. კარდიფის „მილენიუმ სთედიუმზე“ გამართული მატჩი, როგორც მოსალოდნელი იყო, უშეღავათო და საინტერესო გამოდგა. პირველი ტაიმი ფრედ, 1-1 დასრულდა. რონალდუს მიერ მე-20-ე წუთზე გატანილ გოლს, 7 წუთში მარიო მანძუკიჩმა ულამაზესი, ზუსტი დარტყმით უპასუხა.

თამაშის მეორე ტაიმი, მადრიდელთა სრული უპირატესობით წარიმართა. ზიდანის გუნდმა ორი უპასუხო ბურთი გაუტანა მეტოქეს. 61-ე წუთზე შორეული დარტყმით, ჯერ კაზემირომ გამოიჩნა თავი, ხოლო 64-ე წუთზე რონალდუმ მეორედ აიღო ბუფონის კარი და დუბლი გაიფორმა.

საბოლოო წერტილი კი, 90-ე წუთზე, შეცვლაზე შესულმა, მარკო ასენსიომ დასვა. აღსანიშნავია, რომ „რეალმა“ ზედიზედ მეორედ მოიგო ჩემპიონთა ლიგა და პირველი გუნდი გახდა, რომელმაც ტიტულის დაცვა შესძლო. ჯამში სამეფო კლუბმა, ევროპის ყველაზე პრესტიჟული საკლუბო ტურნირი, მე-12-ედ მოიგო.